amalinks wokungena

Inhlanganiso yeJubilee Debt Campaign Ixoxisana Lamalunga ePhalamende Ngesikwelede se Zimbabwe

  • Gibbs Dube

Inhlanganiso ekhankasela uzwelo kweziphathelane lezikwelede zamazwe womhlaba eye Jubilee Debt Campaign ithi isiqalisile ukuxoxisana lamalunga amadale ephalamende kwele Bhilithane leZimbabwe ukuthi ancedise ukuthi kuhlolisiswe isikwelede se Zimbabwe esesisinda.

Umnu. Tim Jones umqoqi wenhlelo zeJubilee utshele iStudio 7 ngoLwesithathu ukuthi amalunga asebehlangane lawo atshengisa idlabuzani lokuthi azasebenza gadalala ukuthi isikwelede lesi sihlolisiswe.

UJones uthi sebebambisane njalo lenhlanganiso ebona ngezikwelede eye Zimbabwe Coalition on Debt and Development ekhangelelwe ukuthi ibe yiyo ezaqhuba umkhankaso lo.

Uphinde wathi ukuhlolisisa isikwelede lesi kuzakwenza kube sobala ukuthi yasetshenziswa njani imali eyayibolekwa yi Zimbabwe ibandla le Zanu PF lisabusa lodwa.

Uqhubeke wathi kuyenzakala ukuthi isikwelede seZimbabwe silahlwe zinhlanganiso ezitshiyeneyo nxa singahlolisiswa zinhlanganiso ezizimele zodwa lohulumende.

Isikwelede lesi sikhangelelwe ukufika kumabillion ayisitshiyangalombili amadollar eMelika – $8 billion - kusiya phela umnyaka.

Unkosazana Nomalanga Moyo wenhlanganiso yeJubilee Debt Campaign uthe umkhankaso lo ulakho ukuphumelela.

XS
SM
MD
LG