Inengi labantu beZimbabwe sebehlabe omkhulu umkhosi bekhonona ngezifundo ezintsha i-new curriculum, abangayizwisisiyo eyethulwe ngomnyaka odluleyo nguMnu. Lazarus Dokora, owayengumphathintambo wezemfundo kuhulumende kaMnu. Robert Mugabe.
EVictoria Falls ababalisi labazali sebephakame besithi ngeke bavumele amasiko lolimi lwabo ludungeka.
UNkosazana Buhle Ncube, umbalisi kwesinye sezikolo zeVictoria Falls, uthi kubi kakhulu okumunyethwe ngezinye ingwalo okumele lusetshenziswe ngabantwana.
“Ugwalo olulenkinga yiHeritage Book yabo Form 1 and 3. Olunye njalo ngolufundisa ezokholo okumele lusetshenziswe ngabantu abakusigaba semfundo ephansi kuGrace 2. Ugwalo lolu lwethula kubi ezamasiko abantu.”
“Kusobala ukuthi labo abaloba lezongwalo abazilutho ngabahlali balumhlubulo welizwe nanko-ke bebhala lolimi olungayisilo … Bakhuluma ngokunye okungekho kulimi lwesiTonga njalo kabethuli ngemfanelo ulimi lolu.”
Uphinde wathi kunengi kakhulu okulotshwe kungwalo lezi okungahloniphi abantu beBinga, abalwela inkululeko abanjengo Mnu. Joshua Mqabuko Nkomo, izinduna zeMatabeleland labanye abantu abaqakathekileyo.
Abazali bavumelana lokukhonona kwababalisi njalo bathi abantu beMaNdebeleni ababambane bengavumeli amasiko lendimi zabo kudilizwa ngabomo.
UMnu. Nkomazana ungomunye okhala ngokwenzakalayo ezikolweni.
“Lento isibonakala manje isivela eVictoria Falls khona kuyinto evele isihlupha eMatabeleland. Ungathi uyabheka kakhulu kuleminyaka edlulileyo uzathola ukuthi kulamatitshala ayabe efundisa ema primary schools eMatabeleland engasazi isiNdebele, engasazi isiNambiya, engasazi isiTonga kodwa umephambili kwabantwana balowomhlobo uyabafundisa ubufundisani.
“Inhloso yokuthi ekugcineni kucina sokudilizwe wonke umhlobo womuntu oseMatabeleland. Bafuna ukubhidliza amasiko ethu …”
Abazali baphathekile ngendlela i-curriculum le entsha eyenziwa ngayo.
Kukhanya uhulumende uvumelana logatsha lwakhe lwemfundo ekoneni lekuvoxeni ulimi lamasiko emihlobo yabantu etshiyeneyo kwele Matabeleland.
Kasenelisanga ukukhulumisana leziphathamandla zikahulumende ngodaba lolu.
