amalinks wokungena

Breaking News

Kwenziwa Umbuthano Wokunanza Impilo Kamuyi uDr Joshua Nkomo eSouth Africa


uDr Joshua Mqabuko Nkomo

Umuyi uDr Joshua Mqabuko Nkomo wayengumkhokheli owayehlukile kakhulu njengoba waqeda isikhathi esinengi empilweni yakhe elwela iZimbabwe elokuthula, engelakubandlululana ngemihlobo njalo elempumelelo.

Lokhu kwethulwe yizikhulumi embuthanweni wokunanza impilo kaNkomo, oqhutshelwe eHilbrow Theatre eJohannesburg. UNkomo uzelwe mhlaka 19 Nhlangula 1917 wasebhubha mhlaka 1 Ntulikazi 1999.

Izikhulumi zonke abezisemkhosini wokuthakazelela impilo kamfokaNyongola eJohhannesburg zimchaze njengomunye wabakhokheli beZimbabwe abalutshwana ababehlonitshwa lokuthandwa ngabantu bemihlobo yonke elizweni.

Le yimbongi yeZimbabwe uThabani Dibi Sibanda esethula inkondle yakhe kaNyongolo kulumkhosi ongenwe ngamakhulu ezizalwane zeZimbabwe eHilbrow Theatre eJohannesburg ngempelaviki.

UThabani uthi nxa inkokheli zeZimbabwe zingekela ukubandlulula abantu ziyabe zifunde okunengi kuNkomo.

Umnumzana Mehluli Moyo, oweJoshua Nkomo Cultural Movement uthi usizi yikuthi inengi lezinto esezixotshe abantu elizweni okaNyongolo wayexwayise ngazo kodwa wangalalelwa.

UMoyo uthi sinye kuphela isifundo esingathathwa zinkokheli kuNkomo ukuze izizalwane zeZimbabwe zonke zimanyane ekuqedeni indubo ezibhekane lelizwe. Uthi njengenhlanganiso emele ukukhuthazwa kwempilo kamuyi baphakathi kokukhulumisana lohumende ngesicelo sokuthi ilanga lamhlaka 1 Ntulikazi minyaka yonke kube likhefu elizweni jikelele lokuhlonipha lokukhumbula impilo kaNkomo.

Umkhokhela inhlanganiso eyiyo eqoqe umbuthano kaNkomo eyeMatabeleland Entertainment News umnumnzana Muthusi Ndlovu uthi bathokoziswe kakhulu linani labangene umbuthano kaMqabuko lonyaka.

Imbongi yeZimbabwe Ubongani Ncube laye obekulo umbathano uthi ukungakhohlwa abantu yinto enkulu inkokheli zeZimbabwe okufuze ziyifunde kuMqabuko.

XS
SM
MD
LG