Izidumbu zabantu ababhubha engozini yomgwaqo eBotswana kumaviki amabili edluleyo zingcwatshwe ngoLwesine eTsholotsho eMalinda leMalili, njalo omunye wabakade begula ubikwa ebhubhile esibhedlala seMahalapye khonale eBotswana.
Izidumbu lezi zihlangabezwe emgceleni wePlumtree Border Post njalo zilethwe emizini yazo ngoLwesine ngemva kwemadabukabusa.
Ababhubhileyo bebeleminyaka ephakathi kwamatshumi amabili lane-24 lamatshumi amathathu lanhlanu-35. Babalisa uMenson Ncube, Davison Sibanda, Eunice Moyo, Sharon Moyo, Liston Mlilo, Nozithelo Sibanda, Langelihle Phiri, Boniter Ncube, lo Methuseli Sibanda.
Abanye ababili yizelamani uNdodana Gumbo obeleminyaka eyisikhombisa loNokubonga Gumbo obeleminyaka eyisitshiyangalombili, bona abadabuka eMatjinge, eBilingoma, esigabeni seBulilima.
Unina wabantwana ubikwa wasila kulingozi ndawonye labanye abayisithupha imota ababehamba ngayo isiya kwele South Africa ize iphume emgwaqweni iyetshayana lesihlahla.
Isiphathamandla sikahulumende eTsholotsho uNkosikazi Nosizi Dube ubikwa esithi abanye babengelancwadi zokuhambisa, okubangele ukuthi izidumbu lezi zingalethwa ekhaya ngesikhathi esifaneleyo.
Induna yeTsholotsho u Chief Gampu Sithole obesemngcwabeni weMalanda village koSibanda, utshele uSithandekile Mhlanga weStudio 7 ukuthi abantu bebehlulukelwe ngoba umuyi nguye obeselela imuli.
