Umufi uMnu. Nicholas Nleya lonkosikazi wakhe uMargaret ababulawa ngoLwesibili olwedluleyo eMzaza Empandeni ePlumtree bangcwatshiwe ngoMvulo emathuneni eWami lapho izihlobo, abangane, omakhelwane, kanye lababekhonza labo abakade bethe gwaqa bezobavalelisa.
Amapholisa athi uMnu. Nleya, obeleminyaka eyisitshiyagalombili lantathu-83, kanye lonkosikazi wakhe obelengamatshumi ayisikhombisa lasitshiyagalombili-78 babikwa babulawa ngabantu abangaziwayo, okucatshangelwa ukuthi babezontshontsha, njalo asadingisisa ngaloludaba.
Udaba lolu lwatshiya inengi labantu lithukuthele ngenxa yesihluku ababulawa ngaso, ngoba imizimba yabo yaqunywa njalo yatshiselwa endlini.
Iphephandaba lebulenjini eleCITE lithi inengi labakhulume kulumbuthano eligoqela abazukulu, abantwana, kanye lomkhokheli weMDC-T uNkosazana Thokozani Khuphe bathe ababili laba babengabantu abathandekayo njalo bencedisa umphakathi ngokunengi-nengi.
Ezinye izakhamizi zibikwa zisithi zihlalele evalweni ngoba abenza lokhu bengakabotshwa.
UMnu Nleya lonkosikazi wakhe batshiye abantwana abalitshumi kanye labazukulu.
UMnu. Dumisani Nkomo, isiphathamandla seHabbakuk Trust uthi umufi uMnu. Nleya wasebenza lenhlanganiso yakhe ukuthuthukisa inhlelo zamanzi lezokulondoloza intandane Empandeni, endaweni ezigoqela iPhakama, Mahlabazihlangene, kanye le Valukhalo.
