amalinks wokungena

Breaking News

Kuphumelele Ukutshengisela Kutsho Abaqoqi Bomkhankaso we31st July Movement


Emzini weBudiriro ngosuku lokutshengisela okweAnti-Corruption, mhlaka 31 Ntulikazi.

Abaqoqi bomkhankaso we 31st July Movement wokutshengisela ukukhonona ngenkohlakalo kuhulumende bathi uphumelele okwamagama nxa kukhangelwa ukwenza kwabezomvikela emadolobheni ilizwe lonke lapho abakade bevimba uzulu ukuba angangeni emadolobheni.

Abezomvikela bebenyakazela phakathi kwedolobho leHarare kanye lemizini ehlala abanengi bekhuthaza labo abakade becatshangelwa ukuba bayazizulela nje ukuba babuyele emakhaya.

Ekuseni indizamtshina zamasotsha zohlobo lwama helicopters zibonakale zindiza ngenhloso yokubona ukuba kwenzakalani emphakathini lanxa abanye bebecabangela ukuba yikwenza kwabakubutho mhla kungcwatshwa iqhawe njengoba lamuhla bekubekwa elinye lawo uRetired Chief Air Marshal Perence Shiri obengumphathintambo wogatsha lwezokulima obhubhe ngoLweSithathu.

Omunye wabakade beqoqa uhlelo lwalamuhla umnumzana Charles Nyoni uthi luphumelele okwamagama.

“I- Demo nje ngabantu abangena emgwaqweni begijima, betshaywa, bebotshwa. Hatshi ke, sesike sathi fundiyani kwamanye amazwe nje njalo sabalabala amabhuku ambalwa asitshengisa khona ukuthi hayi, khonokho okwenzakeleyo, okokuthi kuthiwa kule Demo abantu bahlala ezindlini amapholisa agcwala emigwaqweni lamasotsha lemibhobho agcwala emigwaqweni. Kutshengisa ukuthi iDemo yethu iphumelele ngoba thina amadolobha wonke kade evaliwe. ”

Okusekelwe ngumsekeli wesikhulumeli seMDC Alliance umnumzana Felix Magalela Mafa Sibanda.

“Sesikubonile ukuthi amajaha la ngamagwala njalo abakwenzileyo ukubopha abantu, behluthuna abantu ezindlini, bethatha amafulayimatshina besenza imisindo ebusuku bethatha amabhiza begijima ngawo, bethatha izinja besethusela abantu, konke lokhu kumhlophe ukuthi i Demonstration le iphumelele njalo iphumelele ngamandla amakhulu kakhulu.”

Unkosikazi Nokuzola Tshili wasemzini weMufakose uthi okungasacaciyo yikuba ukwenza kwabezomvikela laba kungaba yibo abenze uphumelele lumkhosi walamuhla loba hatshi.

“Akula activity enengi, ama shop avulile kodwa abantu bazihlalele ezindlini. Laba ababonakala benga one, one esitaladeni ngabantu abalendingeko enkulu, abazama ukuya ezibhedlela. So okungasacaciyo yikuthi ngabe bakhuthaza ukuthi abantu behlale ezindlini kube yi silent Demonstration or what, akukhanyi kuhle.”

Kodwa uhulumende uthi awuzange uphumelele umkhosi wokutshengisela njengalokho obekukhangelelwe njengoba abanengi bengazange baphatheke.

Umabhalane wogatsha lwezemibiko umnumzana Nick Mangwana ulobe enkundleni yokukhulumisana yebulenjini beTwitter ukuthi okwenzakeleyo kuyajabulisa ngoba uzulu ekhethe ukuzilondoloza kugciwane le COVID-19 wazihlalela emakhaya endaweni yokuzibeka engozini yokulithola.

Lanxa bekuthule endaweni ezinengi amapholisa abophe abambalwa ababalisa isikhulumeli se MDC-Alliance u Advocate Fadzai Mahere lequla lakhe abekade betshengisela ngokuthula bephethe amabhakana akade elemibiko esola imisebenzi yenkohlakalo elizweni.

Umlobi lomdlali wemidlalo kamabonakude olodumo unkosikazi Tsitsi Dangarembga ubotshiwe laye ngoba ephatheke kulokhu kutshengisela ngokuthula lapho abonakale ehamba labanye bakhe bephethe amabhakana abesola ukwenza kukahulumende kanye lenkohlakalo.

Kuthi abesifazana abathathu okuyinkokheli yabatsha ebandleni leMDC Alliance elikhokhelwa ngumnumzana Nelson Chamisa, onkosazana Joanna Mmombe, Cecilia Chimbiri lo Tsitsi Marova, babotshiwe besuka emthethwandaba kaMantshi lamuhla.

Abathathu laba bebekhatshwe ngamagqwetha abo umnuzana Obey Shava lo Advocate Thabani Mpofu lapho besiyazibika emapholisanei phansi kweziqondiso zabo zebail.

Intathelizindaba uMduduzi Mathuthu we ZimLive ulandwe emzini wakhe izolo ngendlela efana laleyo eyasetshenziswa kulandwa enye njalo elokhe ivalelwe uHopewe Chin'ono.

UMathuthu wetheswa umlandu wokutshotshozela lokhu kutshengisela kanye lokusebenzisana labafuna ukugenqula umbuso uhulumende athi wakhethwa ngokusemthethweni.

Facebook Forum

XS
SM
MD
LG