Kulokungezwani kubandla le People’s Democratic Party (PDP) kulandela ukungena kumanyano wamabandla ezombusazwe phansi komanyano we MDC Alliance
Umkhokheli webandla leli, uMnu. Tendai Biti, uthi akungenwe kumanyano ngoba iyiyo yodwa indlela engenza banqobe ibandla le Zanu PF kodwa eyinye inkokheli ithi akubuyelwe kuyokhangelisiswa okunenginengi kumanyano lo okubalisa igama lomanyano lo.
Ibandla le PDP lasungulwa ngemva kokwehlukana ingqindo lomkhokheli weMDC-T uMnu. Morgan Tsvangirai owaphanga wagijimela emthethwandaba ukuthi bonke abasuka ebandleni lakhe basungula ele PDP kumele baxotshwe edale lephalamende.
Abanye ngabathi lelibandla selilakho ukudabuka phakathi phezu kwezikhundla. IStudio 7 ixoxe lesikhulumeli sebandla leli, uMnu. George Mkhwananzi, othe abavumelani lebizo lomanyano lo.
"Ibandla le PDP lathuma abantu ukuthi bayexoxisana lalabo abathi bafuna ukuthi kube lomanyano kodwa okutholakalayo yikuthi asivumelani lezingqumo ezaphuma lapho ezigoqela igama lokuthi umanyano wona lo uzabizwa ngokuthi uyini."