amalinks wokungena

Breaking News

Kuqhamuka Udlakela Lwezombusazwe eVungu


Zanu PF
Zanu PF
Abalandeli be Zanu PF eNkabazwe, ezansi kanye lenhla yeMandebeleni babikwa sebevuselele ngezinga eliphezulu imisebenzi yokwethusela abasekeli bamanye amabandla aphikisana labo , ikakhulu abahlaliswa kutsha emapulazini e Insiza North asebethenjiswe ukuthi bazaxotshwa uma iZanu PF inganqotshwa kanti eVungu eNkabazwe kutshiswe umuzi wesinye isiphathamandla secele le MDC elikhokhelwa nguProfressor Welshman Ncube.

Sekungumjaho wamabhiza phakathi kwamabandla ezombusazwe alwela ukuba yiwo azabumba uhulumende weZimbabwe ozavela nxa luphethwa ukhetho oluzabanjwa ngoLwesithathi lweviki ezayo.

Phakathi kwalamabandla, iZanu PF, iMDC, iMDC-T kanye le Zapu yiwo asephume phambili emkhankasweni njalo abonakala ngemihlangano kanye lezembatho ezitshiyeneyo eziphawula lapho inhliziyo zawo ezikhona.

Kwenziwa zonke izithembiso lelo lalelo bandla lisithi yilo elilobukhokheli obungachaphisa uzulu we Zimbabwe angene kwele Canaan kanti abanye njalo sebemi ngomkhankaso wokudiliza izimilo zabaphikisana labo.

Becuthana besenze nje abakhokheli bezombusazwe, uzulu we Vungu esenkabazwe usehlalele evalweni esesaba ukuhlukuluzwa ngabasekeli be Zanu PF asebevuke ubhova.

Udlakela lwezombusazwe kulesisigaba luvuke ngeviki ephelileyo lapho abangaziwayo abacatshangelwa ukuthi ngabasekeli be Zanu PFbetshise umuzi kaNkosikazi Winnet Ndlovu, yena owahlaliswa kutsha epulazini le Dawson Farm njalo oseyisiphathamandla secele leMDC eVungu.



Abahlaliswa ezigabeni ezisemapulazini eInsiza North labo bathwele nzima ngabalandeli be Zanu PF asebethembise ukuthi bonka abahlaliswa kutsha abasekela amacele eMDC le Zapu bazathathelwa imizi baxotshwe ngemva kokhetho.

Luhlupho olufanayo ku ward 20 lapho okubikwa abantu besethuselwa okokuthi abanye bayabaleka uma abamabandla aphikisana le Zanu PF bezama ukukhuluma labo.

Abasezigabeni ezibalisela iGwelutshena, eMateme kanye le Nesigwe bona bathi ngaphandle kokuhlutshwa ngabasekeli be Zanu PF abadabula imibhalo yabo yemikhankaso enanyathiselwe ezindaweni zikazulu, babhekana njalo lodubo lwamapholisa asekela iZanu PF okokuthi aseze egqoka lempahla yayo yomkhankaso.

IStudio 7 yehlulekile ukukhuluma lamapholisa eNkabazwe kodwa uNcube uthi ukwethuselwa okwenziwa abasekeli bakhe libandla le Zanu PF kuveza sobala ukuthi leli bandla liyabona ukuthi libhekane lokunqotshwa libandla licele lakhe le MDC ezigabeni ezinengi ze eNkabazwe, ezansi kanye lenhla yeMandebeleni.

Umgcinisihlalo weZanu PF enhla kweMandebeleni njalo okhankasela ukuphinda amele njalo Insiza North edale lephalamende uthi labo abathi ibandla lakhe liyabethusela yibo asebetshaywa luvalo lokuthi iZanu PF izabanqoba kabuhlungu ekhethweni lweviki ezayo.
XS
SM
MD
LG