Intathelizindaba ziyekele ukuya emhlanganweni lenkokheli yeqembu lenguqu ele Highlanders zitshengisa ukungathokozi kwazo ngesinqumo saleliqembu esokwalisa abaqeqetshi balo ukukhuluma lentatheli ecingweni.
Isinqumo esithethwe yinkokheli yeqembu le Highlanders ensukwini ezedluleyo esokuba abaqeqetshi balo bakhulume bekhangelene lentatheli enkundleni mzukwana leliqembu lidlala langoLwesine ku press conference eqhutshelwa ehofisini yaleliqembu kuphela sekudale ukufuthelana okukhulu.
Iqembu le Highlanders libize intathelizindaba emhlanganweni wepress conference ngempelaviki edluleyo lapho elethule khona umbiko wokuba isiphathamandla saleliqembu uNdumiso Gumede nguye osezakhuluma lentatheli ngaphandle kwangoLwesine lamzukwana iqembu lidlala ngempelaviki.
Intatheli ziveze ukungathokozi kwazo ngalesisimo kodwa uGumede utshile izikeyi esithi amaqembu akoBulawayo adlala kusigaba sePremier Soccer League manengi yikho intatheli kumele zike zixolele iqembu le Bosso kwezinye insuku.
Intathelizindaba zizame ukuchasisa indlela ezisebenza ngayo zisithi isinqumo sokuba zingaxoxi labaqeqetshi ngaphandle kwangoLwesine langempelaviki senza umsebenzi wazo ubenzima.
Umgcinisihlalo weqembu le Highlanders uPeter Dube ucine ethembisa intatheli ukuba loludaba bazaluhlolisisa kakutsha esithi okudale ukuba bafike kulesosinqumo yikuzama ukuvikela isimo seqembu.
Udaba olucasule inkokheli zeqembu le Highlanders ngolokuthi umqeqetshi walo uMafu uphume ezindabeni kuthiwa uthe loJesu angeke aliqeqetshe leliqembu ngenxa yabalandeli balo abangela sineke.
Ngokucasuka okukhulu zithe zisuka emhlanganweni lo intathelizindaba zemidlalo ziye zayabhala udaba lokuthi uMafu uthe yena akasomqeqetshi webhawa, mhlawumbe kuyindlela yokukhomba inkokheli ze Highlanders ukuba la zingatholakala indaba ezingafaki iqembu esimeni esihle.
Bekumele ube khona njalo umhlangano lentathelizindaba ehofisini yeqembu le Bosso kodwa intathelizindaba zemidlalo kazizange zilugxobe umsekeli kamqeqetshi weqembu uMandla Mpofu kanye lenkokheli zeqembu baze bazihambela.
UMpofu nguye okhulume lentatheli ngemva komdlalo weqembu le Highlanders lele Dongo Swamill ngeSonto edluleyo.
Iqembu le Bosso lizemukela ele Caps United ngeNsonto enkundleni ye Barboufields emdlalweni weligi.