Sokuqhamuke ukufuthelana phakathi kukasibalukhulu webhanga elikhulu lelizwe iReserve Bank of Zimbabwe, uMnu. Gideon Gono, lomsekeli wakhe kuboard yabaqondisi balelibhanga uMnu. Charles Kuwaza.
Ukufuthelana lokhu kubikwa kubangelwe nguKuwaza othi uGono kumele abotshwe.
UKuwaza, owayengu mabhalani omkhulu wogatsha lukahulumende lwezemali, uthi uGono wabhidliza iRBZ ngesikhathi esenza inhlelo ezazingekho emthetwheni kusukela ngomnyaka ka 2003 kusiya ngo 2008.
Uthi kumele abotshwe ngoba wanika izihlobo labasekeli be Zanu PF imali yelizwe kungela mvumo.
UGono loKuwaza babikwa besilwa kakubi okungenza ukuthi inhlelo ezilungiswa yi board esanda kufakwa eRBZ zingaqhubeki kahle.
Umphathintambo wezemali uMnu. Tendai Biti ukhangelelwe ukuthi angenele kuloludaba.
Umnu. Masimba Kuchera, ingcwethi kwezenotho, utshele uGibbs Dube we Studio 7 ukuthi banengi abafisa ukuthi uGono aphume aphele eRBZ.
