amalinks wokungena

Breaking News

Kuqhamuka Umkhuhlane Wesihudo eHarare


Zimbabwe Mobile Clinic
Udubo lokuqhamuka komkhuhlane wesihudo soluhlasele imizi eminengi yeHarare ngesikhathi izakhamizi ezinengi zaleli dolobho zikhala ngokuthi umanisiphala uyehluleka ukugcwalisa indingeko zazo ezigoqela ukubuthwa kwezibi kanye lokuzitholisa amanzi ahlanzekileyo okusebenzisa.

Imbiko ephuma eHarare iveza ukuba sokulabantwana abambalwa abatholakale belomkhuhlane lo wesihudo emizini egoqela iMabelreign, Ashdown Park kanye le Westlea. Izakhamizi zalimizi zikhala ngokuthi sezisabela ukuthi lumkhuhlane ulakho ukudala umonakalo omubi usabalale ngoba kungela kuhlanzeka kuleli dolobho ngenxa yodubo lwamanzi.

IStudio 7 ibhodabhode emakhilinika ambalwa agoqela eye mzini we Mabelreign yathola abantwana abambalwa besendwendweni yokumelela ukwelatshwa. Abanye babo bebehlanza njalo bekhala obukuveza ukuba bebefuthelwa.

Omunye umzali obe lomthanakhe kule ikhilinika uNkosikazi Hilda Sawopha utshele iStudio Seven ukuthi ukuqhamuka kwesihudo lesi kubangelwa yikhansili engenelisi ukutholisa izakhamizi amanzi ahlanzekileyo esithi sikhuluma kanje yena emzini wakhe usele viki yonke impompi yakhe ingaphumi amanzi.

Abongi kule ikilinika yeMabelreign Satellite Clinic ongathandanga ukubetwa ngegama utshele iStudio 7 ukuthi sebelaphe abantwana ababanjwe yilumkhuhlane abedlula abalikhulu kusukela ngoMvulo yonale iviki.

IStudio 7 yehlulekile ukuthola impendulo kugatshwa lwezempilakahle ngalolu daba ngoba umapthintambo wezempilakahle uDr David Parirenyatwa ubengadobhi ucingo lwakhe kuthi umqondisi obona ngezovika ukusabalala kwemikhuhlane uNkosazana Portia Manangazira, ubetshela intathelizindaba ukuthi zikhulume lomsekeli wakhe uDoctor Phiri, ngoba yena engenelisi etshayela. UPhiri laye walile ukukhuluma esithi kakukhulunywe lesiphathamandla sekhansili uProsper Chonzi umqondisi obona ngezempilakahle kukansili.

Lanxa iStudio 7 ingenelisanga ukukhuluma labakucele likahulumende imbiko ephunyiswa nguye iveza ukuba kulabantu abazinkulungwane phose ezilitshumi abelatshwa umkhuhlane wesihudo ekugqitshweni kweviki kamhlaka 11 May 2014 lapho okufe khona abantu abayisithupha.
XS
SM
MD
LG