Kuqhubekela Phambili Ukufuthelana Emabandleni Ezombusazwe Ngalokho Okwethulwa yi Wikileaks

Imbiko eyethulwa ebulenjini beWikileaks ikhanya isitshiye ukungezwani ebandleni elikhokhelwa nguMnu. Morgan Tsvangirai lakubandla le ZANU PF lika Mongameli Robert Mugabe.

Udaba lolu lubikwa luhlafunwe ngoLwesithathu emhlanganweni webandla likaTsvangirai lapho abanye abalandeli balo abathe kumele kukhulunywe ngalabo abachothoza inkokheli yabo bexoxa leziphathamandla zikahulumende weMelika ezazisebenzela kwele Zimbabwe.

Kubikwa kuphose kwatshaywana emihlanganweni le njengoba abanye kade befuna ukuthi kukhulunywe ngoMnu. Nelson Chamisa, uMnu. Obert Gutu kanye lo Mnu. Tendai Biti abacatshangelwa ukuthi bathi uTsvangirai kenelisi ukucabanga okujulileyo njalo kakwazi ukukhokhela ibandla leli.

Ibandla leli lithi loludaba kalusoze luphathwe njalo lungeke lwabhidliza iMDC kaTsvangirai.

Kusenjalo, uMongameli Mugabe uthi ibandla lakhe sokumele lidingisise okwethulwa yi Wikileaks okutshengisa ukuthi eyinye inkokheli yebandla leli kayisamfuni.

Iziphathamandla zebandla leli ezibikwa ukuthi zakhuluma kubi ngobukhokheli buka Mongameli Mugabe ngabasekeli bakhe uMnu. John Nkomo lo Nkosikazi Joice Mujuru, uMnu. Saviour Kasukuwere, uMnu. Jonathan Moyo labanye okukhanya ukuthi basekela uMnu. Emmerson Mnangagwa kubandla leli abafuna ukuthi athathe isikhundla sika mongameli.

Umnu. Moyo ubikwa ukuthi wacela usomabhizimusi olodumo we Bhilithane uMnu. Richard Branson ukuthi adinge izigidi ezilitshumi zamadolla eMelika zokunika uMongameli Mugabe ukwenzela ukuthi atshiye isikhundla.

UMoyo uyakuphika lokhu loba nje evuma ukuthi wake wahlangana lo Branson wenkampani yeVirgin Group.

Umnu. Clement Moyo olwela ilungelo loluntu njalo eyingcwethi kwezombusazwe uthi loludaba kumele luphathwe kahle ngoba lulakho ukubhidliza amabandla womabili.

Eyinye njalo ingcwethi kwezombusazwe uMnu. George Mkhwanazi uthi akumelanga ibandla le MDC likhohlwe ngokwakhulunywa ngezinye iziphathamandle zebandla leli njengoba kukhanya kulokukhonona ngobukhokheli bukaTsvangirai.