amalinks wokungena

Breaking News

Kuqhutshwa Uhlelo Lokuxegwa Kwamaqembu Enguqu Emncintisweni Wenkezo yeAfcon


Soccer Ball

Uhlelo lokuba amaqembu azadlala njani kumncintiswano wamazwe awezwekazi le Africa owenkezo eye Africa Cup of Nations, womnyaka ozayo, lukhangelelwe ukuqhutshwa kusasa ngoLwesibili kweleCameroon. Iqembu elimela I Zimbabwe elama Warriors, lalo ngelinye elilinde ukubona ukuba lizadlala lawaphi.

Amaqembu angamatshumi amabili lane azafakwa kuzibaya eziyisithupha njalo kusibaya ngasinye kuzakuba lamaqembu amane.

Phambilini kokuba amaqembu afakwe kuzibaya, afakwe embizeni ezintathu njalo iqembu lama Warriors lifakwe embizeni yesithathu ndawonye leqembu lase Gabon, elase Guinea Bissau, ele Cape Verde, ele Mauritania kanye lele Sierra Leone okutsho ukuba alingeke lifakwe sibaya sinye lawo lawa maqembu.

Imeneja yeqembu lama Warriors uWellington Mpandare uthi isifiso sabo ngesokuba bengafakwa sibaya sinye leqembu elimela ilizwe le Cameroon okuyilo eliqoqa limidlalo.

“Kumaqembu amanye angamatshumi amabili lantathu iqembu esingalesaba ngele Cameroon ngoba lona liyabe lidlala lisekhaya okutsho ukuba lizabe lilosekelo olukhulu kakhulu phose wonke umuntu efuna ukuba lidlulele phambili.

Yisifiso sethu ukuthi singahlangani leqembu elimela ilizwe eliqoqe imidlalo njangalokho esakwenza kumncintiswano weAfcon elizweni lase Egypt ngo 2019 lapho esafakwa ndawonye leqembu le Egypt kanye lowe Chan 2020 lapho esasikusibaya sinye leqembu le Cameroon,” kutsho uMpandare.

Embizeni yakuqala kuleqembu le Cameroon, ele Algeria – okuyilo elinqobe kumncintiswano owaqhutshelwa kwele Egypt ngo 2019, ele Senegal, eleTunisia, ele Nigeria kanye lele Morocco.

Embizeni yesibili kulamaqembu abalisa ele Egypt, ele Ghana, ele Mali, ele Ivory Coast, ele Guinea kanye lele Burkina Faso.

Amaqembu azaphutsha imidlalo yezibaya ehlezi endaweni ezimbili eziphezu kwengalane kanye lamaqembu amane azabe elemiklomelo eminengi kulawo ahlezi endaweni yesithathu yiwo azadlulela kusigaba esilandelayo esomncintiswano njalo uMpandare uthi ulethemba elokuba lele Zimbabwe lizadlulela phambili.

“Amanye lawa amaqembu siyafana nje, ngosowethu. Sikhangelele ukuthi nxa singanqoba kumidlalo yethu kumbe sibe ngutshiki lobhanqa singaphutsha imidlalo yezibaya sisendaweni yesibili loba sibe ngelinye lamaqembu azabe ehlezi endaweni yesithathu azadlulela phambili,” kutsho uMpandare.

Umncintiswano we Afcon 2021 ukhangelelwe ukudlalwa ekuqaleni komnyaka ozayo kusukela mhla ziyithoba munwe munye kunyanga kaZibandlela kusiyafika mhla ziyisithupha kunyanga ka Nhlolanja.

Lumncintiswano ubuhlelwe ukuba udlalwe lonyaka kodwa wadluliselwa phambili ngenxa yobhubhane lwe Covid – 19.

Udaba lwezemidlalo lomncintiswano oweAfcano siluphiwa nguJoseph Njanji
please wait

No media source currently available

0:00 0:02:31 0:00

Facebook Forum

XS
SM
MD
LG