EleMelika liqhube umkhosi wokunanza imisebenzi yabalingisi owe 91st Annual Academy Awards, ama Oscars eLos Angeles ngeSonto ebusuku.
AmaOscars alonyaka abehluke ngokuthi abengelamkhokheli, owaziwa ngokuthi yi host kumbe u-MC. Abathethe izicoco bebe menyezelwa ngabatshiyeneyo abakhethelwe ukwenza lokhu.
Okwakufanele aqhube lumsebenzi ngumahlekisa uKevin Hart, owacina ekhalala ngoba abanye bemgcona ngokuthi wachothoza izitabane, lanxa wakwenza eminyakeni elitshumi edluleyo. Waxolisa kodwa wahle watshiyana lomcimbi lo.
Abaqhubele abanqobileyo izicoco ngabalingisi kanye labalodumo endaweni ezitshiyeneyo abagoqela oDaniel Craig, Tina Fey, Whoopi Goldberg, Samuel L. Jackson, Michael B. Jordan, Pharell, Queen Latifah, Serena Williams, Helen Mirren, loTyler Perry.
Bekulelunga ledale lecongress elebandla lama Democrats uMnu. John Lewis njalo inengi limthakazelele. Omunye wabathethe isicoco singakayi emoyeni ngu Mahershala Ali kumbukiso othiwa Green Book. Umbukiso ka Spider Man: Into the Spider Verse, lawo uthethe isicoco.
URegina King, oncinte abanye kusikhundla sokuba ngumsekeli womlingisi kumbukiso othi “If Beale Street Could Talk,” ubonge unina ngemfundiso enhle athi yabangela ukuthi aphumelele kulokho okwenzayo.