Kukhangelelwe ukuba lomkhosi omkhulu owe rally eNtabazinduna ekupheleni kwenyanga ezayo lapho okuzabuthana amabandla ezombusazwe, inhlanganiso ezizimeleyo, labantu balesosigaba abaholwa yinduna eyakhutshwa esikhundleni nguhulumende uMnu. Nhlanhlayamangwe Ndiweni.
Uhulumende uthi akufanelanga uMnu. Ndiweni abesesihlalweni sobuduna ngoba engakhethwanga ngemfanelo, njengoba engasozibulo lomdeni wakhe.
Obikwa elizibulo koNdiweni nguMnu. Joram yena owakhweza loludaba emthethwandaba ephikisa ukukhethwa komfowabo, kodwa unina uMasuku wathi umuyi uChief Khayisa Ndiweni nguye owatshiya eqonqosele ukuthi uNhlanhla athathe isikhundla sakhe ngenxa yesimilo sakhe.
Umgcinisihlalo weMDC eMatabeleland North uMnu. Prince Dubeko Sibanda, omela iBinga North edale lephalamende uthi ibandla lakhe yilo elikhokhela ukuqoqwa kwalumkhosi, lixhaswa yizigaba zalo eMatabeleland South, Midlands, lakoBulawayo.
Kusenjalo, UMnu. Nhlanhlayamangwe Ndiweni wazise ukuthi uselubhekise eNgilandi lapho azahlinzwa khona ilihlo ngendlela yokumelapha, ngoba sokwehlule eZimbabwe. Uthi uncediswe ngabantu besigabeni sakhe eNtabazinduna kanye labanye kuhulumende ngendleko zohambo lwakhe
