Amazwi kaMongameli Robert Mugabe awokuthi kasoze asuke esikhundleni kumbe akhethe umuntu ozamelama ekukhokheleni ibandla leZanu PF sokutshiye inengi lisithi sokusegcekeni ukuthi uMugabe engaba efuna ukufela esikhundleni.
Ekhuluma emhlanganweni awenzele eBindura ngoMgqibelo lapho achothoze khona umsekeli wakhe uMnu. Emmerson Mnangagwa, uMugabe uthe isisekelo seZanu PF sisobala ekuthini umkhokheli walelibandla ukhethwa ngabasekeli balo emhlanganweni weCongress.
“IConstituition yeZanu PF ithi umkhokheli kumele akhethwe kuCongress. Mina ngingaba lomuntu engimsekelayo kodwa kumele ancintisane lamanye amacandidates emhlanganweni weCongress,” kutsho uMugabe.
“Ngalokho ngiyawulandela umthetho ngoba lami ngiligqwetha. Ngiyazilandela iziqondiso zebandla. Angifuni ukuthi kuzothiwa ngatshiya ngifake umkami."
UMugabe uchothoze amacele alwela isikhundla sakhe kuZanu PF - elikhokhelwa nguMnangagwa eleLacoste leleGeneration 40 esithi aselethe ukufuthelana okukhulu ebandleni lakhe.
Lanxa uNkosikazi Grace Mugabe ethe akulanto ethiwa yiG40, uMugabe uthe likhona lelicele njalo lasungulwa nguMnu Saviour Kasukuwere labanye bakhe.
Ingcwethi ecubungula ezombusazwe uMnu. Brilliant Mhlanga utshele iStudio 7 ukuthi uNkosikazi Mugabe ngeke evume ukuthi kulecele elithiwa yiG40 ngoba lilunga laleli cele.
