amalinks wokungena

Breaking News

Ele Zimbabwe Linanza IPress Freedom Day Loba Kulobunzima


Ele Zimbabwe limanyane lamanye amazwe womhlaba ngolweSine ekunanzeni umsebenzi wentathelizindaba emhlabeni jikelele ele World Press Freedom Day elinanzwa minyaka yonke ngoNkwenkwezi.

Kunanzwe ilanga leli eZimbabwe ngesikhathi kulokhe kusehlula ukuthi kuguqulwe imithetho yamaphephandaba kanye leyokusakaza eye Access to Information and Protection of Privacy Act, Broadcasting Services Act, Interception of Communications Act le Public Order and Security Act encindezela intathelizindaba.

Emhlabeni wonke jikelele, inhlanganiso yentathelizindaba iReporters Without Borders ithi kubulewe intathelizindaba ezingamatshumi amabili lanye njalo kunzima ukusebenza emazweni anjenge Syria le Somalia lapho okulempi zomvukela.

Kwele Zimbabwe, uMnu. Morgan Tsvangirai oyinhloko kahulumende wethule umbiko othi ibandla le Zanu-PF libona engani lingalahlekelwa ngumbuso nxa kungaba lemisakazo lamaphephandaba amanengi elizweni azimele wodwa.

Umnu. Tsvangirai uthe loba kulamankampani amabili abalisa iZimbabwe Newspapers Group le AB Communications anikwa amalicence yi Zimbabwe Media Commission okuthi bavule imsakazo emitsha, lokhu kwenzelwa ukunceda ibandla le Zanu-PF hatshi uzulu.

Ukuze sihlaziye umkhosi we World Press Freedom Day sixoxe loMnu. John Masuku umqondisi we Radio Voice of the People loMnu. Zenzele Ndebele umhleli womsakazo we Radio Dialogue abathe kuzakubanzima ukuthi kuvulwe imsakazo lamaphephandaba amanengi azimele wodwa kwele Zimbabwe nxa ibandla le Zanu-PF lilokhe lilokhe lisembusweni.

XS
SM
MD
LG