Omunye wabakade bebotshwe ngoMvulo baze betshengisele besola ngokwethulwa kwemali yama bond notes, uMnu. Ishamael Kauzani, uthunjwe ngabacatshangelwa ukuthi ngamapholisa eZimbabwe awensitha.
UKauzani, okunhlanganiso yabasakhulayo yokutshengisela, ubhaxabulwe kabuhlungu watshiywa ethe tasa egangeni duzane leHarare.
Okwamanje usesibhedlela seHarare lapho ayelatshwa khona izilonda ezesabekayo ezigoqela unyawo okubikwa ngamanye amaphephandaba ukuthi lwephulwe yimota ekade itshayelwa yilabo abamthumbileyo.
UKauzani ulomfowabo owabulawa ngesikhathi sokuzakwenziwa ukhetho oluqakathekileyo ngomyaka ka2008 ngabantu abacatshangelwa ukuthi ngabasekeli bebandla leZanu PF.
Kasenelisanga ukukhuluma loKauzani ngodaba lolu. Abanye ababotshiwa ngesikhathi kuthunjwa uKauzani, ababalisa isikhulumeli se Tajamuka-Sesijikile, uMnu. Promise Mkhwananzi, bakhululwe ngoLwesine ngumthethwandaba.
Inhlanganiso ezigoqela iTajamuka, iZimbabwe Congress of Trade Unions leRural Teachers Union of Zimbabwe kade zikhangelelwe ukuthi zizatshengisela ezitaladini zikhonona ngemali yama bond notes.
Zithwaliswe nzima ngamapholisa avale indawo zonke eHarare okwenze ukuthi abasekeli benhlanganiso lezi ngengangeni ngobunengi babo ezitaladini.
Amapholisa atshele iZCTU ukuthi itshiyane lokutshengisela ikhangele ukuhlupha izisebenzi hatshi udaba lwama bond notes.