Inhloko kahulumende uMnu. Morgan Tsvangirai uthi iholo lezisebenzi zikahulumende elikhuphulwe ngoLwesihlanu lilutshwane njalo belingakahlafunwa okugcweleyo lidale le Cabinet.
Isikhulumeli sakhe uMnu. Luke Tamborinyoka uthi imadlala ephiwe izisebenzi kayisoze yenele abakufunayo ngenyanga njengoba leliholo elikhuphukileyo lingaphansi kwe poverty datum line eyedlula kancance amakhulu amahlanu amadola eMelika.
Umnu. Tamborinyoka uthi amakhulu amabili lamatshumi amahlanu lantathu amadola emelika azaholwa yizisebenzi ezingela zikhundla kuhulumende kumele akhutshulwe nxa kungatholakala imali.
Kodwa-ke ukukhuphuka kweholo leli kujabulise ibandla le ZANU-PF kanye lezisebenzi zikahulumende.
Sokukhangelelwe ukuthi umphathintambo wezemali uMnu. Tendai Biti uzahlangana lenhloko kahulumende kanye loMongameli Robert Mugabe kusasa ukwenzela ukukhulumisana ngeholo lezisebenzi osolulethe ingxabano kumabandla abusayo.
Ingcwethi kwezenotho uMnu. Masimba Kuchera uthi kusobala ukuthi iholo lezisebenzi selisetshenziswa ngamabandla abusayo ukukhankasela ukhetho oluzayo.
