amalinks wokungena

Breaking News

Kuqhamuka Ukuxokozela Edale Lephalamende Ngenxa kaMnu. Gideon Gono


Kuqhamuke ukuxokozela okubi edale lephalamende ngoLwesibili kulandela ukwala kuka sibalukhulu webhanga elikhulu lelizwe ele Reserve Bank of Zimbabwe uMnu. Gideon Gono ukuveza amagama abantu abathola izikhwelede zamathalakitha lokunye okokulimisa kuhlelo lwe Farm Mechanization.

UGono utshele ikhomithi yezokulima ekhokhelwa nguMnu. Moses Jiri ukuthi angeke aveze amabizo alabo abathola amakhuba, ama combine harvesters lama planters.

Uthe umthetho ophathelane lokusebenza kwebhanga leli lamanye amabhanga owe Banking Act kawumvumeli ukuthi akhulume amagama abantu abafaka imali emabhanga.

Lokhu kwenze uMnu. Paddington Zhanda webandla le Zanu-PF lo Mnu. Jiri bathukuthele okwamagama bamtshela ukuthi ulakho ukujeziswa ngoba engafuni ukuveza amagama la.

Amalunga edale lephalamende awebandla le Zanu-PF uMnu. Bright Matonga lo Nkosikazi Sarah Mahoka bazondiswe yizenzo zababili laba bacina bekhulumela phezulu okwethuse wonke umuntu.

Lokhu kwenze ukuthi uZhanda aphume ngesiphangiphangi kukhomithi le kodwa wathembisa ukuthi uGono uzajeziswa lidale.

UGono labanye bakhe akade sebethithibele bacine becela ukuthi bakhululwe njengoba besokuphoselanwa aqhatha.

Uthembise ukuthi uzawadinga amabizo la lobanje kungathatha inyanga eziyisithupha ukuthi lokhu kwenzakale ngenxa yokuxotshwa kwezinye izisebenzi zeRBZ.

Uhlelo lolu lwasebenzisa izigidi ezingamakhulu amabili zamadollar - $200 million.

Umnu. Masimba Kuchera ingcwethi kwezenotho uthi bonke abantu abathatha amathilakitha lokunye kokulimisa kumele babhadale izikwelede lezi ebhanga le RBZ.

Kusenjalo, uMnu. Tendai Biti ukhangelelwe ukwethula okuphathelene lesimo somnotho welizwe kusukela ngoZibandlela kusiyafika kuNtulikazi lonyaka ngolwesithathu edale lephalamende.

Ingcwethi zenotho zithi uBiti ulakho ukutshela uzulu ukuthi ilizwe kalisoze lenelise ukuthola imali ekade ikhangelelwe yokuqhuba inhlelo zikahulumede lokubhadala izisebenzi.

Zithi lokhu kwenziwe yikuthi akulamali etholakala ekwembeni amadayimana eMarange esabelweni seManicaland.

XS
SM
MD
LG