amalinks wokungena

Breaking News

Woza Friday: Iqembu Labalingisi eleND Productions


Nonhlalo Dube(Photo by Joseph Njanji)
Nonhlalo Dube(Photo by Joseph Njanji)
Liviki kuWoza Friday intathelizindaba yethu uJoseph Njanji usethulela iqembu le ND Productions kungxoxo ayenze lomqondisi waleliqembu uNonhlalo Dube. Leli liqembu labalingisi elibunjwa ngabesifazane kuphela elisebenza lisedolobheni lako Bulawayo eselisungule uhlelo lokufundisa abantwana abahlala endaweni ezigcina intandane umsebenzi wokulingisa ndawonye lokunye okumayelana lezemidlalo eyokuzilibazisa.

Inhlanganiso ye ND Productions ibiza uhlelo lwayo lokufundisa abasakhulayo abagcinwe endaweni ezigcina intandane labantwana abahlukumezekileyo ngegama elithi ‘Theatre for everyone’.

Umqondisi walinhlanganiso uNonhlalo Dube uthi injongo yabo ngeyokupha abantwana laba ulwazi lokuziphilisa kwelakusasa.

Okwakhathesi inhlanganiso ye ND Productions isebenza labantwana abahlala endaweni ezigoqela iKhayelihle, iJohn Smale, Emthunzini Wethemba, iSandra Jones kanye le SOS.

Basebenza labantwana abaleminyaka elitshumi kusiya kutshumi lambili ngoba besithi laba yibo asebekusibanga sokuphathiswa ukuba bakhethe ukuba bafuna ukwenzani empilweni.

UNonhlalo uthi bakubone kufanele ukusebenza labantwana abahlala emakhaya agcina abantwana abadubekileyo ngoba bona bekhohlakala kunhlelo ezifana lalezi eziqhutshwa zingatsha zikahulumende.

Abanye abasebenza loNonhlalo kuhlelo lwe Theatre for everyone ngabagoqela ingcitshi zokulingisa abanye babo abafundele ukulingisa beqeqetshwa yinhlanganiso ye Amakhosi Theatre.

Laba ngabagoqela uSithandazile Dube oyimbongi elodumo edolobheni lako Bulawayo kanye loNomvuyiso Mabi yena oke wabonakala kumdlalo othiwa ‘Yeyeni bantu’ ophume kumabonakude we ZBC njalo uphekwe yiyo inhlanganiso ye ND Productions.

Linhlanganiso isike yabukisa imisebenzi yayo emikhosini efana le Hifa ikanti iyasebenzelana njalo lenhlanganiso ezimela amalungelo kazulu eziyabe zifuna ukufundisa abantu zisebenzisa imidlalo yokulingisa.

UNonhlalo uthi loluhlelo lwe Theatre for everyone lukhangelelwe ukuba ngomnyaka ozayo luqhele luye langaphandle kwedolobho lako Bulawayo.

Kesizwe nampa beqhuba umsebenzi wabo mhla beqala uhlelo lwabo endaweni egcina abantwana eye John Smale.

Isifiso senhlanganiso ye ND Productions yikuba ekupheleni komnyaka lezindawo abasebenza lazo zibuthane ndawonye kube lomncintiswano wokudinga labo abazabhala baphinde balingise umdlalo ozachaza izibukeli.
XS
SM
MD
LG