Uhulumende usethumele amapholisa ukuyazingela izizalwane zakwamanye amazwe eziseSouth Africa ngokungekho emthethweni ezihlala elokitshini leDiepsloot eJohannesburg. Lokhu kwenzakala ngesikhathi abokuza abangelamaphepha abahlala elokitshini leRiverpark labo sebetshelwe ukuthi baphume kuleyo ndawo ngokuphangisa.
Amakhulu ezizalwane zakwamanye amazwe inengi labo kungabeZimbabwe, baboshiwe ngamapholisa elokitshini leDiepsloot ezindlini, abanye endleleni abanye ezitolo besetheswa umlandu wokuba selizweni ngokungekho emthethweni.
Abanye babikwa sebebalekele kwamanye amalokitshi. Lokhu kungemva kokuba izakhamizi zaleli lokitshi zitshengisele okwamalanga zifuna abakwamanye amazwe abahlala kulindawo bengelamvumo yokuba selizweni baphume baphele. Lokhu kutshengisela kuze ngemva kokubulawa kwepholisa lezakhamizi ezimbili.
Amapholisa abegcwele ndawana yonke kuleli lokitshi ngemva kokwethekelela kukamphathintambo wogatsha lwezamapholisa umnumnzana Bheki Cele.
“Ngifuna bezogcina ukuthula njalo bacwayisise amacala okubulala okuthiwa edalwe kuleli lokitshi.”
Kodwake inkulumo kamphathintambo wendaba zasekhaya umnumnzana Aaron Motsoaledi ayethule kuzakhamizi zeDiepsloot yiyo etshiye abakwamanye amazwe bezonde beganunwabu.
“Ngolwesibili sibophe abokuza abedlula inkulungwane bonke sebephuma ejele ngamacala okubulala lokubamba iganyavu. Ngibabuyisele kubo ngoba ziyigangi.”
Lokhu sekusolwe kakhulu zinhlanganiso ezimela amalungelo abakwamanye amazwe zisithi linkulumo ikhuthaza udlakela lwexenophobia.
Bathi njalo uhulumende ubengelalungelo lokuthumela amapholisa kusiyagonjolozelwa bonke abokuza kungelabufakazi bokuthi yibo abadala amacala wonkela okuthiwa bawenzile.
Inhlanganiso yeAfrican Diaspora Forum ithi ifuna isiqiniseko sokuthi amalungelo ababotshiweyo labo azahlonitshwa kanti ithi bakhona abalemvumo yokuba kweleSouth Africa ababotshiweyo.
Kodwake esinye isakhamuzi seDiepsloot umnumnzana Khaza Masuka sithi bathokoze kakhulu ngokubotshwa kwabokuza laba njalo sebezizwa bephephile.
“Bayabulawa abantu bazaretshwa. Kwenzeka everything ebuhlungu ebantwini and zenziwa ngabantu abaphilayo. Ngokhu sekufanele ukuthi siphile ngenye indlela esingayaziyo okutsho ukuthi thina abantu balapha eSouth Africa asikhuselekanga.”
Kusenjalo abakwamanye amazwe abahlala elokitshini leRiverpark labo sebehlalela evalweni njengoba lakhona sekuphume isaziso sokuthi abokuza abangelamaphepha okuhlala kulelozwe okusemthethweni kabaphume baphele ngokuphangisa ngoba bengehluleka bazawukhomba olotshwala.
