Ukukhulumisana phakathi kwebandla leZANU PF lamabandla aphikisayo kuyaqhubeka ngoLwesihlanu lapho amakhomithi abunjwe ngamabandla lawa ensukwini ezedluleyo azacubungula ukuthi kuyini kahle-kahle okumele kwenziwe ukuze kulungiswe umumo oselizweni.
Inkulumo lezi ziqale kunyanga edlulileyo ngemva kokunxuswa kwabakhokheli bamabandla aphikisayo ngumongameli Emmerson Mnangagwa esithi kumele bakhulumisane badinge indlela zokuhlenga ilizwe ebunzimeni elikubo.
Umkhokheli weMDC uMnu. Nelson Chamisa wenqaba ukuphatheka kulezinkulumo. Abaphakathi kwazo bagoqela umkhokheli weMDC-T uNkosazana Thokozani Khupe labanye abambalwa.
Asebephume kuzo besithi ngamadlwane bagoqela umkhokheli webandla leBuild Zimbabwe uMnu. Noah Manyika loMnu. Daniel Shumba.
Sixoxe lengcwethi kwezombusazwe uMnu. Dumisani Nkomo yena othi kaboni inkulumo lezi ziphumelela ngaphandle kokuthi abenhlanganiso ezizimeleyo lezokholo baphatheke kuzo njalo umongameli Mnangagwa loMnu. Chamisa bahlale phansi bakhulumisane.
