amalinks wokungena

Breaking News

Uzulu Usola Ukuxotshwa kukaNkosikazi Joice Mujuru


Owayengumsekeli kamongameli uNkosikazi Joice Mujuru

Uzulu weZimbabwe, kungakhathalekile ukuba ngowaliphi ibandla lezombusazwe, uyasola ukuxotshwa kowayengumsekeli kamongameli, ongomunye wabalwa impi yenkululeko, unkosikazi Joice Mujuru, ebandleni le Zanu PF. Sichazwe ngabanengi njengamandlwane lesi senzo njalo sizaphazamisa lelibandla kwelizayo, ngoba sifundisa abasakhulayo ukungahloniphi abadala.

Abakhulumisane le Studio Seven bathi lesi senzo sipha imfundiso engayisiyo kwabasakhulayo ngoba bezakuthatha njengethuba lokungahloniphi abadala ikantike bekuludaba obelungalungisiswa ngezinye indlela kusenziwa ngasese.

Umqondisi wenhlanganiso ye Bible Ministries e Harare umfundisi Wyson Dutch, ngomunye wabasole lesi senzo lanxa ethi akalani lebandla le Zanu PF kodwa ethi lokhu kwenza kuzaba yindlela elandelwa ngontanga kwelizayo ngoba sekuthathwa njengesibonelo esihle.

Uthi umfundisi Dutch lo okukhulunywa ngaye, unkosikazi Mujuru, kungasi muntukazane, engumuntu olembali eyaziwayo yokuphatheka empini yenkululeko, engumfelokazi njalo engumuntu omdala ohloniphekayo okungamelanga ahlambazwe ngaleyo ndlela.

Lokhu kusekelwe ngumnumzana Sazini Maphosa wase Lower Gweru. UMaphosa uthi lei senzo sibonisa ukuba selilahleka lelibandla, zingaseko izeluleko okumele zilandelwe ukuqeda ukuphambana kwemibono kilo hatshi ukuzichaya ngalendlela.

Lokhu kusekelwe njalo ngomunye wezakhamizi zemzini we Eastlea e Harare umnumzana Masimba Kuchera othi okwenzakala ebandleni leZanu PF kungabamangalisi lanxa kuyangisa ethi ngoba kulibandla eselazifundisa ukungahloniphi muntu.

Unkosikazi Joice Mujuru uxotshwe okusemthethweni ukuba lilunga leZanu Pf, alisebenzela okwesikhathi eside, kusukela ngesikhathi esiya empini esesemuncinyane.

Unkosikazi Mujuru labanye bakhe okubalisa omnumzana Rugare Gumbo, Didymus Mutasa lo Themba Mliswa baxotshiwe kulelibandla, besetheswa umlandu wokufuna ukuvukela umbuso kamongameli Mugabe kanye lokufuna ukumbulala.

Bayakulandula lokho laba bantu bethi le kuyimisebenzi yabafuna ukuzisondeza phansi kukaMugabe, becathamela ubukhosi lapho esesuke esikhundleni njalo bechazwa njengomafikizolo abangelayo lakancinyane imbali yokulwela ukukhulula ilizwe embusweni owawuncindezela abansundu.

XS
SM
MD
LG