Kuyaxokozela kubandla leZanu PF okukhethwa inkokheli entsha ngesikhathi kulungiselelwa ukhetho oluzakwenziwa ngomnyaka ozayo langomnyaka ka2023.
Kulemibiko ethi ziyakhala izibhakela kwezinye indawo ngesikhathi kusenziwa ukhetho lwezabelo lolwezigaba kubangwa izikhundla. Kodwa ibandla elibusayo lithi luqhubeka kahle ukhetho ngoba abantu bazikhethela labo ababafunayo.
Kambe lukhululeke kanganani ukhetho kubandla leZanu PF? UMnu. Joseph Tshuma, okudale leZanu PF Central Committee, uthi abantu bayazikhethela inkokheli yabo njalo benza lokhu bekhululekile.
UTshuma uthi bakhona njalo abenza abanye bengahlaliseki ngakho-ke kulabanye abadunga ingqubekela phambili.
UMnu. Nhlanhla Moses Ncube, unobhala jikelele wenhlanganiso yeFreedom Alliance, uthi abanye abantu bancindizelwe okumangalisayo kubandla elibusayo.
UNcube uthi kuyethusa ukubona lokhu kubandla leZanu PF ngoba yilo elibusayo njalo elilenhlangothi eziqhuba ukhetho eZimbabwe.
