amalinks wokungena

Breaking News

Abantu Bathi Ibandla leANC Libambisana Lele Zanu PF Ekwephuleni Ilungelo Likazulu


Abalandeli bebandla leAfrican National Congress.
Abalandeli bebandla leAfrican National Congress.

Izizalwane zeZimbabwe kwele South Africa zisola ibandla elibusayo eleAfrican National Congress (ANC) ngokuphatheka ekutshengiseleni kukahulumende weZimbabwe kokusola izijeziso zomnotho ezetheswa ezinye iziphathamandla zeZanu PF.

AbeZimbabwe laba bathi lokhu kuveza ukuba iANC isekela ukwephulwa kwamalungelo oluntu lenkohlakalo eqhubekayo elizweni.

Ekutshengiseleni kwango Lwesihlanu kwalabo abebesola izijeziso zomnotho ezafakelwa ezinye iziphathamandla zebandla elibusayo leZanu PF lamankampani adlelana labo eZimbabwe, amalunga ebandla leANC leziphathamandla zalo yibo abebebanengi kulabo abebesesigodlweni seAmerica lemahofisini enhlanganiso yamazwe eEurope, eyeEuropean Union ePretoria besithi lezi zijeziso kazesulwe.

UMongameli Cyril Ramaphosa
UMongameli Cyril Ramaphosa

Le yinto esicasule inengi labeZimbabwe abathi bebekhangelele ukuthi iANC kube yiyo ekhuthaza iZimbabwe ukuthi yekele ukwephula amalungelo lenkohlakalo ukuze ezomnotho zihlaliseke eZimbabwe.

Isizalwane seZimbabwe umnumnzana Freedom Ndlovu uthi isenzo seANC lesi sibadanisile.

“Lokhu kutshengisela ukuthi iANC isupporter iZanu PF kuleyi isystem eyenzakalayo eZimbabwe. Ngoba lamhlanje siyahlupheka, kutsho ukuthi yinto abayijabulelayo labo ukuthi sibe khonalapha eSouth Africa. Siyatshaywa, siyahlukunyezwa which means iANC iyayisupporter le indaba yeZanu PF.”

UMnu. Nkosini Tshuma yena uthi sekuyisikhathi sokuthi abantu bazibuze ukuthi iANC itholani ngokuvikela iziphathamandla zikahulumende weZimbabwe zisenza okungenziwayo kweleSouth Africa.

“Basibhekile isimo esenzakala laphana uhulumeni wephula amalungelo abantu. Kufanele ukuthi kube yibo abaqala ukuthi baxwayise iZanu PF ukuthi iqale ilungise isimo sezomnotho kanye lamalungelo kazulu. Siyabona abantu bayanyamalala, bayabulawa, bayashaywa, so lokho i ANC lakho iyakusupporter okuyinto embi kakhulu.”

Kodwa-ke Ilunga leviyo labesivazana ebandlani leANC, uNkosikazi Malebo Lepinga, uthi basekela iZimbabwe ngoba bengavumelani lezizatho zamazwe ethulele iZimbabwe izijeziso zomnotho.

Leyinto egcizelelwa yisiphathamandla sebandla leANC, uMnu. Dakota Legoete, uthi ngeke bagoqe izandla iMelika igxamukela kwezombusazwe eZimbabwe.

“Bafanele bazi abantu baseEuropa nase Britain leAmerica ukuthi iZimbabwe, ilizwe, ihulumende, manje bafanele bahloniphe isovereignty yamaZimbabweans ukuthi bafanele bathole isolution yengxaki yabo.”

Kodwake isizalwane seZimbabwe, uMnu. Bongani Ncube, uthi kusegcekeni ukuthi ngesiphithiphithi esenzakala eZimbabwe, eleSouth Africa liyahlomula kumathuba ezomnotho aphunyukwe yiZimbabwe.

EleMelika lona selikubeke kwacaca ukuthi lezi zijeziso ezethulelwe abantu lamankampani athile zizasuswa kuphela nxa iZimbabwe ingaqala ukuhlonipha amalungelo oluntu, ukuvumela ukwethulwa kwemibono lemibiko ngokukhululeka, kanye lokujezisa labo abenze inkohlakalo.

XS
SM
MD
LG