amalinks wokungena

Breaking News

Kuzavunyelwa Abahlatshwe COVID-19 Vaccine Kuphela Embukisweni oweHarare Agricultural Show Walonyaka


Zimbabwe Agricultural Society

Osanda kuphiwa isikhundla sokuba nguMqondisi wenhlanganiso eye Zimbabwe Agricultural Society, uDr Andrew Matibiri uthi umbukiso walonyaka wezokulima oweHarare Agricultural Show, uzokwenziwa kusukela mhla ka 27 Mpandula ugqitshwa mhla ka 1 Mfumfu.

Abafisa ukuzobukisa lonyaka babikwa bezamele babe ngabahlatshwe ijekiseni yokuzivikela kuCOVID-19 ngokupheleleyo, kumbe baveze incwadi zokuhlolwa nsuku zonke ukuthi kabala gcikwane leli.

U Dr Matibili uveze lokhu emhlanganweni lentathelizindaba eHarare, wokwazisa ngokuqhutshwa kombukiso wezokulima oweHarare Agricultural Show walonyaka esithi uzabe wehlukile kulowanyakenye.

“Kuzakuba lendawo lapho izethekeli zizothola ukuhlolwa khona kungela nhlawulo ngesikhathi lumbukiso uqhutshwa. Kuthi phakathi khona kuzokuba lendawo lapho abafuna ukuhlatshwa bezohlatshwa kungela nhlawulo. Kuzakube kuthathwa lama temperatures kuwo wonke ama gedi wokungena phakathi. ”

Umnumzana Effie Dlela Ncube wenhlanganiso ebona ngamalungelo abathengi, eye National Consumer Rights Association – NACORA, uyalisola inyathelo likahulumende lokuvumela abahlatshiweyo kuphela ukungena embukisweni wezokulima we Harare.

“Abantu bengakaphoqelelwa ukuthi baveze izithupha eziveza ukuthi bahlatshiwe, kumele kube sekwenzeke konke okudingakalayo ukuthi abantu bahlatshwe esibalela ukuthi kube khona lawo majekiseeni, abekhona. Okwakhathesi ayashota, ayasilela kakhulu.”

Okwenziwa nguhulumende umnumzana Dlela Ncube uthi yikwephula ilungelo loluntu.

“Ngakho ke, nxa uzathi abantu kumele babe sebehlatshiwe bonke abeza emhlanganweni kumbe abangena emsebenzini kumbe abangena ezikolo kodwa lelo jekiseni libe lingekho kuyo yonke indawo ukuze kube lula ukuthi abantu bahlatshwe, kuyikwephula ilungelo labantu lokho, kumele kuvinjelwe. Abantu kababe lejekiseni leli kube lula ukuthi bahlatshwe ngendlela efaneleyo kungakafakwa imigomo evimbela ukuthi babe sendaweni ezithile.”

Okusekelwe ngunobhala jikelele wenhlanganiso yezisebenzi eyeZimbabwe Congress of Trade Unions, umnumzana Japhet Moyo.

“Sesibone ama events kahulumende kakhulu, yibo abakuqakathekisayo ukuthi nxa ungahlatshwanga angazake ube part and parcel yama events ayenziwa nguhulumende. Kodwa ke akubanjwa ngamandla nxa kuyikuthi ke awuhlatshwanga njalo ma ufuna ukuhlatshwa. Uyayikela ke ukungena leyo event. ”

Umbukiso walonyaka wenziwa phansi kwendikimba ethi SYNERGIES FOR GROWTH, COOPERATE, COLLABORATE, COMPLIMENT TO FULLY VALUE SUPPORT FOR THE CAUSE OF AGRICULTURE AND ATTENDED VALUE CHAINS FOR INCREASED PRODUCTION, PRODUCTIVITY AND PROFITABILITY lethi CELEBRATING UNPRECEDENTED GROWTH.

I-Harare Agricultural Show, ngumbukiso omkhulu wezokulima elizweni jikelele ovame ukwenziwa sokugqitshwe imbukiso yezokulima ezigabeni ezitshiyeneyo zelizwe.

Uvame ukwenziwa ngoNcwabakazi minyaka yonke kodwa lonyaka lanyakenye awenziwanga ngaleyo nyanga ngenxa yokuqhamuka kwesifo seCovid-19.

Owalonyaka umbukiso ubikwa uzavulwa okusemthethweni ngolweSine mhla ka 30 Mpandula lanxa umqondisi owe ZAS engasatshongo ukuthi ngubani ozaba engumhlonitshwa ngalolosuku.

Facebook Forum

XS
SM
MD
LG