Abantu abangamakhulu amahlanu abakugwalo lokuvota kodwa becatshangelwa ukuthi bebengabantu bokuthezwa babikwa bevote enkambeni yebutho eye Four Brigade eseMasvingo kukhetho lokudinga umongameli lamalunga edale le phalamende nyakenye.
UMnumzana Tongai Matutu owebandla leMovement for Democratic Change (MDC) elikhokhelwa nguMnumzana Morgan Tsvangirai, omela iMasvingo Urban kudale lephalamende uthi umbiko osanda kwethulwa phezu kokuhlolisisa ugwalo loluhlu lwamagama abalelungelo lokuvota uthi lababantu bavote loba nje kukhanya ukuthi abanye babo bafa kudala kumbe kwakusetshenziswa amabizo okuzibumbela.
Omunye wabavotileyo ubeleminyaka elikhulu lamatshumi amabili lambili- (122) okutshengisa ukuthi wazalwa ngo mnyaka ka 1887.
UMatutu utshele iStudio 7 ukuthi udaba lolu luzahlaziywa edale lephalamende ngesikhathi livulwa ngomnyaka ozayo ukwenzela ukuthi lolu gwalo lulungisiswe.
UMnu. Samukele Hadebe ingcwethi ecubungula ezombusazwe utshele uGibbs Dube weStudio 7 ukuthi kuzakubanzima ukuthi iZimbabwe Electoral Commission esanda kukhethwa nguhulumende womanyano yenze umsebenzi wayo nxa ugwalo lwabale lungelo lokuvota lungalungiswanga.
Abantu abanengi bakhala ngokuthi lolugwalo lulamabizo okuzibazela amanengi afakwa libandla le Zanu PF lisenzela ukunqoba kukhetho lokudinga umongameli lamalunga ephalamende nyakenye.
Ibandla leMDC elikhokhelwa nguMnu. Tsvangirai linqobe kukhetho lokudinga amalunga ephalamende kodwa kwaphosa kwaba ngutshiki lobhanqa ekhethweni lokudinga umongameli okwenze ukuthi kube lokhetho olutsha.
U Tsvangirai ucine ephuma kulolukhetho ekhonona ngokuthi abalandeli bakhe bebebulawa ngabalandeli bebandla leZanu PF ababesekela umongameli Robert Mugabe.
