amalinks wokungena

Breaking News

Kwenziwa Umcimbi Wokukhumbula Umuyi uTsvangirai


UMnu. Morgan Tsvangirai

Ngemva kokukhululeka kweZimbabwe, akekho omunye osebenze njengomuyi umnumnzana Morgan Tsvangirai ekukhokheleni izizalwane zeZimbabwe ukulwela inkululeko ababeyikhangelele ilizwe lithola uzibuse.

Langamazwi ethulwe yizikhulumi ezitshiyeneyo emhlanganweni wokukhumbula imsebenzi kamuyi oqhutshelwe ePretoria kweleSouth Africa.

Ngemva kwenyanga phose ezinhlanu owayengumkhokheli webandla leMDCT umnumnzana Morgan Tsvangirai edlule emhlabeni, izikhulumi zonke ebezisemhlanganweni wokukhumbula imbali yakhe ePretoria, zimchaze njengenkokheli engasoke ibe lomunye ofana layo eZimbabwe.

Umqondisi enhlanganisweni yeSolidarity Peace Trust umnumnzana Brain Raphtopoulos, uchaze umuyi njengenkokheli eyapha isithunzi kumabandla aphikisayo, wenza izisebenzi zakhuluma kwezwakala, wafundisa izizalwane zeZimbabwe ukukhuluma nxa zingasuthiseki ngendlea inkokheli zombusazwe ezibusa ngayo.

“Ubengumuntu owehlukile. Wenza imisebenzi emihle. Wayelamaphutha njengazo zonke inkokheli. Ngicabanga ukuthi kuzathatha isikhathi ukuthi sibone kuvela enye inkokheli efana laye ebandleni eliphikisayo,” kutsho uRaphtopolous

Abanye bamchaze njengenkokheli eyayihamba phambili hatshi lezi ezithi nxa sekubulawana zithumele abantu.

Bakhona abathi nguye owenza iSADC, izwekazi leAfrica kanye lamazwe omhlaba babone njalo bathathe amanyathelo ngokuncindezelwa kwabantu beZimbabwe.

Unkosazana Priscilla Misihairambwi, umchaze njengendoda ebisenelisa ukuthi lehlukane ngemibono kodwa lisale lilokhu lidlelana ngokugcweleyo. Lokhu uthi yinto engasekho ngitsho kunkokheli zeMDC eziseleyo.

“Ukuthi sure sure sesihlezi phansila sesibambana, sesifuna ukutshayana, sesibulalana singabantu banye? Abantu abasukayo sitshaywa, sibulawa sibulawelwa ilizwe lona leli, kodwa lamuhla iZanu isize isihleka, sitshayana amongst ourselves! Kuyini khonalokhu? Yikho okufuze sikufunde sizibuze,” kutsho uMisiharambwi Mushonga.

Umnumnzana Solomon Chikowero, omunye wabasungula ibandla leMDC ndawonye lomnumnzana Tsvangirai, yena umchaze njengendoda eyenelisa ukuchitha ukubandlululana kwaMashona lamaNdebele ebandleni lakhe. Uthi ngumuntu owayelephupho lenguquko kwezombusazwe ezohlomula umuntu wonke kugoqela ngitsho lalabo ababemhlukumeza. UChikowero uthi ayikho iMDC edabukene phakathi engathi iququzela ukuhlonitshwa kwezifiso zikamuyi.

“Manje lokhu esikubonayo ukuthi kuneMDC Alliance going into election, kune MDCT going into election, kuyadivider abantu lokhu. So uMorgan Tsvangirai as his legacy nedream yakhe akusikho ayekufuna khonokho,” kutsho uChikowero.

Kuvele njalo ukuthi ngumuntu owayehlonipha, ekwazi ukulalela, ezwelana labanye. Umnumnzana Nkululeko Sibanda, isikhulumeli somkhokheli webandla le MDC Alliance umnumnzana Nelson Chamisa, yena uthi okwakhathesi umnumnzana Chamisa uzimisele ukuqedelela umsebenzi owatshiywa endleleni ngumnumnzana Tsvangirai.

Kutsho uSibanda: “Upresident Chamisa usenze lokhu ngendlela ephakeme kakhulu ku 6 months lezi ezikhona. Abantu abanengi abavotayo eZimbabwe abantwana labantu abadala, sebetshengisile ukuthi bayamzwisisa, bayamthanda, njalo ubukhokheli obuncane kukhanya sengathi yibo obuthandakalayo, elizweni lonke jikelele. Lamazwe aphumelelayo kumbe asephumelele aphumelele ngalolohlobo.”

Kodwake kuvelile njalo ukuthi umuyi laye wayelamaphutha akhe. Abanye bathi njengenkokheli yeMDC wehluleka ukwenqabela ukudabuka phakathi kwaleli bandla ngo 2005. Ezinye izikhulumi zithi ukwehluleka kwakhe ukuhlela ozathatha intambo ngemva kwakhe, kwabangela uhlupho lombango wesikhundla sakhe kuMDCT.

Zonke izikhulumi zivumelene ukuthi ukusebenzela ndawonye kwamabandla aphikisayo ekhethweni oluzayo kanye lokumanyana kwamacele wonke eMDC yikho okuzakhombisa inhlonipho kumbali kamuyi uMorgan Tsvangirai.

Facebook Forum

XS
SM
MD
LG