Esigabeni sethu sendaba zezizalwane zeZimbabwe esezihlala kwamanye amazwe, liviki sixoxa lomfundisikazi uPastor Letina Jeranyama okhokhela inhlanganiso yokholo lwesiKrestu, eye Interdenominational Women of Faith ofundisa njalo ekolishini lemfundo yaphezulu leUniversity, eBoston eMelika.
Inhlanganiso ayikhokhelayo ilomhlangano wayo omkhulu owenziwa minyaka yonke, owe Conference mhlaka 22 Mabasa yonale inyanga usiyaphela ngeSonto mhlaka 24.
UPastor Jeranyama uchasise ukuba usungule linhlanganiso ngomnyaka ka2010 benza umhlangano wabo wakuqala ngomnyaka ka2013.
“Ngasungula linhlanganiso ngemva kokunxuswa eZimbabwe ukuyakhuluma komunye umhlangano ngumfundisikazi Muzhare. Ngathi ngiphindela ngapha eMelika ngezwa ngisiba lesifiso sokuthi ngisungule inhlanganiso yokumanyanisa omama bekhatshana lekhaya ukuthi babuthane ndawonye becebisane ngezempilo lokuthi bakhule ekukhonzeni kwabo njengamaKrestu”, kutsho uPastor Jeranyama.
Emhlanganweni walonyaka uJeranyama uthi wehlukile leminyaka yonke ngoba banxuse omama ukuthi babuye labomkabo ngoba bazaba lesabo isikhathi sokuxoxa njengabobaba, becebisana endabeni ezithize njalo kulenhlelo zabantwana ngakhoke banxusa imuli yonke ukuthi ize emhlanganweni lo.
Uqhubeke ethi "Kunje sesasungula amabranches eNew Hampshire leNew York. Sikhangelele ukuvula amanye kwezinye indawo ngoba khathesi senganxuswa eIndia ukutshi ngizovula einye laseGhana lakwele Kenya"
