Umnhlangano omkhulu wabosomabhizimusi owenzelwa eVictoria Falls uqalisile ngoLwesine.
Lumhlangano ungenwa ngabaqondisi bamankampani edlula ikhulu lamatshumi amahlanu, iziphathamandla zikahulumende lezethekeli ezivela emazweni atshiyeneyo.
Emhlanganweni lo ophethwa ngoMgqibelo kuhluzwa amaqhinga okuthuthukisa umnotho we Zimbabwe ukuze ufike kusibanga sama billion alikhulu amadollar- $100billion kusiyafika umnyaka ka 2040.
Umnu. Kenias Mafukidze umqondisi wenkampani eqoqe umhlangano lo iFM Financial Solutions uthi ele Zimbabwe lilakho ukuthuthukisa umnotho oqine okwamagama nxa kungela kudonselana kwezombusazwe njalo osomabhizimusi bethola imali yokuthuthukisa amafekithali.
Umnu. Mafukidze uthi nxa umnotho welizwe ocatshangelwa okwamanje ukuthi ulesisindo sokungama billion alitshumi amadollar eMelika, ulakho ukuthuthuka ngokuyisilinganiso sokulitshumi ekhulwini kusiya fika umnyaka ka 2040.
Umnotho lo uthuthuke ngokuyisilinganiso sokwedlula kancane okuyisitshiyagalolunye ekhulwini emnyakeni embili edluleyo.
Uphinde wathi ukuthuthukisa umnotho kufuna ukuzimisela elizweni njengoba kungela mankampani emazweni afuna ukuvula amabhizimusi kwele Zimbabwe.
Umnu. Nkululeko Sibanda ingcwethi kwezombusazwe uthi umnotho welizwe ungeke wathuthuka njengalokho okukhangelelwe ngabaqondisi laba leziphathamandla zikahulumende nxa uzulu etshiywa phandle ekubunjweni kwenhlelo zentuthuko.
