amalinks wokungena

Breaking News

Lidinga Usekelo Lwabalandeli Iqembu Lenguqu, eleBosso Ekutholeni Imali


Highlanders Football Club (Courtsey of Highlanders FC Facebook)

Abalandeli beqembu lenguqu ele Highlanders bakhuthazwa ukuba basekele imizamo esithethwe yileliqembu eyokudinga imali lisebenzelana lamankampani ambalwa.

Iqembu le Highlanders lilobelane isivumelwano labenkampani ye Utande, esokuba linkampani ibhadale abadlali beqembu leli iholo okwenyanga eziyisithupha kusukela kunyanga ka Mpandula.

Umgcinisihlalo weqembu le Highlanders uJohnfat Sibanda uthi amalunga eqembu le Bosso kuzamele edlale indima enkulu ukuze ubudlelwano babo labe Utande buphathise zombili inhlanganiso lezi.

“Ngifuna ukugcizelela ukuthi kungumlandu wamalunga eHighlanders ukuthi sincedise, sisebenze kuhle lalaba esibambisene labo. Imuli ye Highlanders, abanikazi bethimu, bakuzwisise ukuba ukubambisana kuyindlela enhle ngoba amacele womabili asala ephethe okuthile,” kutsho uSibanda.

Abe Utande yinkampani ethengisela uzulu amagagasi okungena ebulenjini okutsho ukuba ukuze isivumelwano sabo leqembu le Highlanders sibaphathise kumele abalandeli beqembu leli bathenge kubo indlela zokungena ebulenjini.

Ngaphezu kokusebenzisana labe Utande, iqembu le Highlanders lilobelane izivumelwano ezokusebenzisana lamanye amankampani agoqela eye Bonique, yona eyenza amakha alophawu lwe Bosso, kanye leye Anzisha Marketing, yona eyenza amathenisi alophawu lwe Bosso.

Impahla lezo zithi zingathengiswa iqembu le Highlanders lithole ingxenye yemali ezithengiswe ngayo.

Kukhona njalo izivumelwano ezifanayo labe Sanctuary Insuarance kanye labe Nyaradzo.

USibanda uthi sekuyiyo indlela eyokuthola imali kulezinsuku.

“Akusela mpilo okuthiwa uzavuka uhlezi uphongu phiwa nje ungazange wenze lutho. Kumele lawe wenze okuthile omunye laye athole, lawe uthole. Okusalayo, singabambisana, kukhulu esingakufeza,” kutsho uSibanda.

Iqembu le Highlanders lilahlekelwe lusekelo lwemali ebeliluthola luvela kwabe NetOne ngemva kokuba sekuqhamuke umkhuhlane we Covid – 19.

Abe NetOne yibo abakade bebhadala abadlali iholo labo njalo ensukwini ezedluleyo iqembu le Bosso belihlezi lisezindabeni ngoba lingenelisi ukuholisa abadlali bona ababikwa bekolodwa iholo lenyanga ezimbalwa.

Leliqembu livame ukuthola imali ngokubhadalisa izibukeli nxa zingena enkundleni okuyinto esileminyaka phose emibili ingenzakali ngoba ezemidlalo zimiswe nguhulumende kuyindlela eyokuvikela ukumemetheka komkhuhlane we Covid – 19.

Lalapho okuke kwadlalwa khona imidlalo eyomncintiswano we Chibuku Super Cup bekungavunyelwa izibukeli enkundleni.

Facebook Forum

XS
SM
MD
LG