Umqeqetshi weqembu lenguqu ele Chicken Inn uJoey Antipas uthi ukuphakamisa kwabo isicoco se Castle Lager Premier Soccer League lonyaka, sekusemandleni kaSomandla ngemva kokunqotshwa kweqembu lakhe ngele Bulawayo Chiefs ngempelaviki.
Abafana be Chicken Inn sebetshiywa ngemiklomelo emihlanu liqembu elihlezi phezu kwengalane ele CAPS United njengoba bona beyale belokhu belemiklomelo engamatshumi amahlanu lantathu ngemva kokunqotshwa kwabo nge 3 ka 1 liqembu le Bulawayo Chiefs ngoMgqibelo.
Phezu kwengalane iqembu le CAPS United lilemiklomelo engamatshumi amahlanu lathoba minwe mbili ngemva kokunqoba elikwenze ele Dynamos nge 1 ka nya ngeSonto.
Endaweni yesibili kuleqembu le FC Platinum lona elilemiklomelo engamatshumi amahlanu lesithupha njalo elinqobe ele Chapungu nge 1 ka nya ngeSonto.
Sekusele imidlalo emibili ukuba imidlalo yalonyaka eyesigaba se Premier Soccer League iyefika komlindi uyacina njalo umqeqetshi weqembu le Chicken Inn uJoey Antipas uthi bona njengeqembu akusekho emandleni abo ukuphakamisa isicoco salonyaka.
“Esesingakwenza njengeqembu yikuba sihlale nje silethemba ngoba namhlanje bekumele sidlale ngokuzimisela okukhulu kodwa asikwenelisanga lokho.
Njengoba ngisitsho kodwa asisoze silahle ithemba njalo sizabe silokhu sithiye ukuba amanye amaqembu azadlala njani ngoba phela siyakholwa ukuba uNkulunkulu ukhona,” kutsho uAntipas.
Emidlalweni yeviki lamatshumi amathathu lantathu iqembu le CAPS United lizadlala lele Ngezi Platinum Stars kuthi ele FC Platinum lizadlala lele Black Rhinos ikanti ele Chicken Inn lona lizadlala lele Herentals.
Ngeviki eyokucina eyemidlalo yalonyaka iqembu le CAPS United lizadibana lele FC Platinum kuthi ele Chicken Inn lona lizadlala lele TelOne.
Iqembu le Bulawayo Chiefs lithe ngokunqoba elikwenze iqembu le Chicken Inn lathuthukisa amathuba alo awokusinda ekugunyulweni kusigaba saphezulu njengoba liphakame layahlala endaweni yetshumi lane lilemiklomelo engamatshumi amathathu lathoba minwe mbili.
Emsileni wengalane iqembu le Mushowani Stars seliphelelwe ngumphako kusigaba saphezulu ngemva kokunqotshwa nge 3 ka nya elikwenziwe ngele TelOne.
Iqembu le Mushowani Stars lilemiklomelo engamatshumi amathathu kuthi phezu kwalo kuleqembu le Hwange lona elilemiklomelo engamatshumi amathathu lantathu njalo elinqotshwe nge 3 ka 2 ngele Herentals lona elihlezi endaweni yetshumi lantathu lilemiklomelo engamatshumi amathathu lathoba minwe mbili.
Endaweni yesithathu nxa usuka emsileni kuleqembu le Yadah lona elilemiklomelo engamatshumi amathathu lanhlanu njalo elinqobe ele Harare City nge 2 ka nya.
Iqembu le Harare City lithe ngokunqonqotshwa elikwenziwe liqembu le Yadah lehla layahlala endaweni yesine nxa usuka emsileni wengalane lilemiklomelo engamatshumi amathathu lesikhombisa.
Umdlalo odlalwe namhla ekuseni enkundleni ye Rufaro phakathi kweqembu le Black Rhinos lele Ngezi Platinum Stars uphele zingutshiki lobhanqa 0 ka 0.
Lumdlalo bekumele udlalwe izolo kodwa wasudluliselwa phambili ngoba inkundla yeRufaro ibisiphenduke ixhaphozi ngemva kokuna kwezulu.
Kusenjalo amaqembu abalisa ele Bulawayo City, ele Whawha, ele Tenax kanye lele Cranborne Bullets azabe edlala kusigaba se PSL ngomnyaka ozayo ngemva kokunqoba kuzigaba ezine ezika division one ezibalisa ese Southern Region, iCentral Region, iEastern Region kanye le Northern Region.
