amalinks wokungena

Breaking News

Likha Phansi Iqembu leGems Emdlalweni Wenkezo yeVilality Netball World Cup


2019 Netball World Cup, Liverpool
2019 Netball World Cup, Liverpool

Likhe phansi ngoMvulo iqembu lomdlalo wokuqaga elimela ilizwe emncintiswaneni wezizwe zomhlaba oqhutshelwa kwele Bhilithane kulezinsuku.

Iqembu leZimbabwe elaziwa ngegama elithi Gems, linqotshwe nge 36 ka 79 liqembu leNew Zealand emdlalweni wesibaya sika Group F.

Iqembu le Zimbabwe lidlulele kusigaba sesibili esomncintiswano wezizwe zomhlaba ngemva kokunqoba ele Sri Lanka nge 79 ka 49 emdlalweni walo wakuqala, lanqotshwa nge 37 ka 73 ngele Australia kowesibili kwathi kowesithathu litshaye ele Northern Ireland nge 51 ka 49.

Limpumela idale ukuba libe ngelinye amaqembu amathathu abefakwe kusibaya sika Group A ekuqaleni komncintiswano adlulele phambili ndawonye le Australia kanye le Northen Ireland kwathi ele Sri Lanka labuyela ekhaya.

Amaqembu lawa akade ekusibaya sika Group A afakwe kusibaya sika Group F ndawonye lamaqembu amathathu aphutshe esendaweni ezintathu eziphezu kwesibaya sika Group B.

Kusibaya sika Group G kulamaqembu amathathu aqede esendaweni ezintathu kusibaya sika Group C laku Group D.

Amaqembu akade ekusibaya sinye awasoze adibane kusigaba sesibili kodwa kuzasebenza impumela yemidlalo eyesigaba sakuqala.

Amaqembu azaphutsha imidlalo yesigaba sesibili ehlezi endaweni ezimbili phezu kwengalane yemiklomelo kusibaya sika Group F lakusibaya sika Group G azadlulela kusigaba se semi – final kuthi azanqoba lapho yiwo azadlulela ku final.

Olandela ezemidlalo uSdani Dlodlo uthi iqembu le Zimbabwe kuzamele libongwe nguhulumende ngokuphakamisa elikwenze igama lelizwe kulimidlalo eqhutshelwa edolobheni lase Liverpool, kwele Ngilandi.

“Nxa sikhangele ukuba amalungiselelo abo abenzima njani ngabe uhulumende uyangenela abaphe umvuzo ngoba labomama benze umsebenzi obukekayo kakhulu. Sithi kibo kabaqhubekele phambili besenza kuhle ngoba bayisibonelo esihle kumankazana asakhulayo.”
Iqembu le Zimbabwe lizadlala lele Barbados ngoLwesibili kuthi ngoLwesine lizadlala lele Malawi.

Emdlalweni wenguqu: Iqembu le FC Platinum liyalele phezu kwengalane yemiklomelo kusigaba se Castle Lager Premier Soccer League loba nje libe ngutshiki lobhanqa 1 ka 1 lele Highlanders ngeSonto.

Iqembu leli eliqeqetshwa nguNorman Mapeza lilemiklomelo engamatshumi amabili lathoba minwe mbili ngemva kokudlala imidlalo elitshumi lane.

Endaweni yesibili kuleqembu le Chicken Inn lona elinqotshwe nge 2 ka 1 ngele Hwange njalo lilemiklomelo engamatshumi amabili lesithupha.

Iqembu le CAPS United lona elitshaye ele Yadah nge 2 ka nya lihlezi endaweni yesithathu njalo lalo lilemiklomelo engamatshumi amabili lesithupha ngemva kokudlala imidlalo elitshumi lane.

Iqembu le Highlanders lona liyale lilokhu lisendaweni yetshumi lane lilemiklomelo elitshumi lesithupha ngemva kokuba ngutshiki lobhanqa lele FC Platinum ikanti iqembu le Bulawayo Chiefs liphakame lasuka phansi kwengalane yemiklomelo ngenva kokunqoba elikwenze ele Manica Diamonds nge 1 ka nya ngoMgqibelo.

Abafana be Chiefs sebelemiklomelo elitshumi lanye ikanti iqembu le Mushowani Stars yilo eselihlezi emsileni wengalane lilemiklomelo elitshumi.

XS
SM
MD
LG