amalinks wokungena

Breaking News

Lindizela Phezulu Kwengalane Yemiklomelo Iqembu leKaizer Chiefs


Uphawo lweqembu legunqu eleKaiser Chiefs lakwele South Africa

Liqhubekele phambili lilokhu lihlezi phezu kwengalane yemiklomelo iqembu le Kaiser Chiefs ngemva kwemidlalo yangempelaviki eyesigaba se Absa Premier Soccer League.

Iqembu leChiefs litshengise ukuba lizimisele ngempela ukuphakamisa isicoco seligi lonyaka ngokunqoba elikwenze ele Polokwane City ngoMgqibelo.

Amakhosi ahluthunele abafana be Polokwane imiklomelo kabuhlungu ngemva kokuba enelise ukuhlohla kathathu sekusele imizuzu elitshumi lane ukuba umdlalo ufike emaphethelweni.

Lumdlalo uphele iqembu le Chiefs lile 3 kuthi ele Polokwane lile 2 njalo limpumela itshiye Amakhosi elemiklomelo engamatshumi amahlanu lambili kuthi iqembu elihlezi endaweni yesibili ele Mamelodi Sundowns lilemiklomelo engamatshumi amane lesithupha.

Endaweni yesithathu kuhlezi iqembu le Orlando Pirates lona elilemiklomelo engamatshumi amane lambili kodwa umlandeli walo uBongani Zoza uthi amathuba alo awokuphakamisa isicoco asenciphe kakhulu.

“Mina noma ngingumlandeli weqembu le Orlando Pirates ngicabanga ukuba angeke sibe sisayithatha inkomitsho ngoba sesadlala imidlalo engaphezu kwaleyo esidlalwe yi Mamelodi Sundowns kanye le Kaizer Chiefs kodwa wona angaphezu kwethu ngemiklomelo.

Futhi ngitsho ngoba ngikhangela langendlela amaqembu ayedlala ngayo kungakamiswa imidlalo ngenxa ye Covid – 19,” kutsho uZoza.

Iqembu le Orlando Pirates selidlale imidlalo engamatshumi amabili lanhlanu okutsho ukuba selisalelwe yimidlalo emihlanu kuthi iqembu le Mamelodi Sundowns lona lingqikilana lele Cape Town City FC emdlalweni walo wamatshumi amabili lane khathesi ntambama.

Ngemva kwalo umdlalo iqembu le Sundowns liyabe selidlale imidlalo elingene laleyo esidlalwe liqembu le Chiefs.

Lawa maqembu azadibana mhla zingamatshumi amabili lesikhombisa kuyonale inyanga ka Ncwabakazi emdlalweni olakho ukutshengisa ukuba isicoco singaphakamiswa yiliphi iqembu.

Iqembu le Kaiser Chiefs lilabadlali abayizizalwane zelizwe le Zimbabwe ababalisa uKhama Billiat kanye lo Willard Katsande.

Kolunye udaba olumayelana lomdlalo wenguqu, iqembu le Inter Milan lizadibana lele Shakhtar Donetsk ku semi - final eyesibili kumncintiswano we Europa League namhla ebusuku.

Iqembu elizanqoba lizahlangana leqembu le Sevilla lona elinqobe ele Manchester United nge 2 ka 1 ngeSonto ntambama ku semi – final yakuqala.

Facebook Forum

XS
SM
MD
LG