Umthethwandaba we High Court eHarare unqume ngoMvulo ukuba umphathintambo wezomvikela, uMnu. Sydney Sekeramayi, owezabelo, uMnu. Ignatius Chombo lomeya wedolobho le Harare. uMnu. Bernard Manyenyeni bengahlukuluzi kumbe ukubopha abaphila ngokuthengisa emgwaqweni.
UChombo ubethe kumele laba bantu basuke emgwaqweni kungakafiki ilanga lanamhla. Kodwa umphathintambo wezamabhizimusi amancane, uNkosikazi Sithembiso Nyoni wazise ukuthi abathengisa ezitaladeni laba sebephiwe kuze kufike mhlaka 26 wayonalinyanga ukuthi basuke ezitaladeni.
Inhlanganiso yabathengisa ezitaladeni, iZimbabwe Informal Sector Organisation-ZISO, ikhweze isicelo emthethwandaba sokuthi uSekeramayi, uChombo lo Manyenyeni bengaphazamisi amalunga ayo, umsebenzi ngokuthumela amasotsha kumbe amapholisa.
Umahluli, uMnu Felistas Chatukuta kazange ethule izizatho zokwethula lesi sinqumo wathi uzakwenza loku ensukwini ezilandelayo.
Igqwetha le ZISO, uMnu. Chris Mhike uthe ulethemba lesi sinqumo sizalandelwa.
Ukhansila wedolobho leHarare, uMnu. Peter Moyo utshele uChris Gande weStudio Seven ukuthi uhulumende usefuna ukugcona ikhansili ngamafutha engulube angayidlanga ngoba esehluleka ukwenza imisebenzi yokuthi abantu bengathengisi ezitaladeni.
UChris Gande uphinde waxoxa lonobhala jikelele wenhlanganiso yabaphila ngokuthengisa ezitaladeni, eye Bulawayo Upcoming Traders’ Association, uMnu. Dumisani Ncube othi abathengisa ezitaladeni bemukele ngenjabulo inyathelo elithethweyo kodwa wathi inkinga yikuthi inengi labo lokhu lingafuni ukuthi libhalise ukuze liphiwe indawo zokuthengisela.