amalinks wokungena

Breaking News

Liqhuba Nzima Iqembu LamaChevrons


Zimbabwe Cricket team.

Kuzamele libophe ziqine iqembu lase Zimbabwe elaziwa ngokuthi ngama Chevrons njengoba kuyilo elihlezi emsileni wengalane yemiklomelo kumncintiswano we 2020 – 23 ICC Men’s Cricket World Cup Super League, wona osetshenziswa ukukhetha amaqembu azadlala kumidlalo yezizwe zomhlaba ozaqhutshelwa elizweni lase India ngomnyaka ka 2023.

Ophethe isikhundla sikamqeqetshi weqembu leli uStuart Matsikenyeri uthi sebeguqule indlela abacabanga ngayo ukuze bathole imiklomelo bakhuphuke engalaneni yemiklomelo.

“Limidlalo yonke ngeye Super League okutsho ukuba iqakatheke kakhulu ngoba kumele sibuthelele imiklomelo.

Sesifike kusibanga esokuthi sisodwa siyavumelana ukuba sikhathele yikuhlala sidliwa njengelizwe njalo sesiguqule ingqondo zasuka ekutheni kumele sincintise kuphela kodwa kumele sibe lenjongo eyokunqoba,” kutsho uMatsikenyeri.

Iqembu le Zimbabwe yilo elijeke amanye emsileni wengalane yemiklomelo lilemiklomelo engamatshumi amabili lanhlanu ngemva kwemidlalo elitshumi.

NgeSonto linqotshwe ngama wickets amahlanu liqembu le Sri Lanka emdlalweni wakuqala kwemithathu okumele liyidlale eye Super League eyohlobo lwe One Day International.

Ocubungula umdlalo kakhilikithi uDumi Praise Dhlakama uthi kuzakuba nzima ukuba iqembu le Zimbabwe lifinyelele ukuyadlala kumidlalo yezizwe zomhlaba lingayala lilokhu linqotshwa.

“Amathuba ama Chevrons awokuthi ahambe ku Cricket World Cup akhona kodwa malutshwane ukuba bangene manqamu ngoba kudingakala amaqembu ayithoba minwe mbili kuphela.

Nxa sikhangela indlela okudlalwa ngayo kudlalwa imidlalo emithathu ngendlela entsha esisetshenziswa ngabe International Cricket Council okutsho lingaze linqobe kowakuqala kuyabe kumele lidlale kathathu leqembu linye ukuze kukhanye ukuthi yiliphi elinqobileyo,” kutsho uDhlakama.

NgeSonto iqembu le Zimbabwe belitshaye kuhle ibhola labuthelela ama runs angu 296 lilahlekelwe ngabadlali abayithoba munwe munye kuma overs angamatshumi amahlanu.

Lisuke laseliyehluleka ukuvikela lelonani lavumela ele Sri Lanka lafikisa amakhulu amathathu ama runs kuma overs angu 48.3 okutsho ukuba besekusele amabhola ayithoba munwe munye ukuthi umdlalo ufike komlindi uyacina.

NgoLwesibili lawamaqembu azadibana emdlalweni wesibili kuthi owesithathu ukhona ngoLwesihlanu mhla zingamatshumi amabili lanye.

Iqembu elinqoba emdlalweni owodwa lithola imiklomelo elitshumi kuthi umdlalo ungaphela zingutshiki lobhanqa amaqembu womabili ayathola imiklomelo emihlanu iqembu ngalinye. Umncintiswano wezizwe zomhlaba uzaqhutshelwa kweleIndia ngomnyaka ka 2023.

Udaba lwezomidlalo kakhilikithi siluphiwa nguJoseph Njanji
please wait

No media source currently available

0:00 0:02:23 0:00

Facebook Forum

XS
SM
MD
LG