Iqembu labesifazane elimela ilizwe emdlalweni kanobhutshuzwayo elaziwa kakhulu ngegama elithiwa Mighty Warriors selifinyelele kusigaba se semi-finals esomncintiswano weCosafa Women’s Championships oqhutshelwa edolobheni lako Bulawayo kulezinsuku.
Iqembu le Zimbabwe lidlulele kusigaba se-semi-final ngemva kokuba kube yilo elibelemiklomelo eminengi kumaqembu aphutshe imidlalo yezibaya esendaweni yesibili engalaneni yemiklomelo.
Amankazana eZimbabwe aphutshe elemiklomelo emihlanu kusibaya sika Group A bengaphansi kweqembu le Zambia lona eliqede imidlalo yalo lilemiklomelo eyisikhombisa.
Kusibaya sika Group B kunqobe iqembu le Kenya lona eliphutshe imidlalo yalo lilemiklomelo eyithoba munwe munye kuthi kusibaya sika Group C kunqobe iqembu le South Africa lona eliqede lilemiklomelo eyisikhombisa.
Imidlalo ye semi-final izadlalwa ngoLwesine lapho iqembu le Zimbabwe elizadlala khona leqembu le Kenya kuthi iqembu leZambia lizadlala lele South Africa.
Iqembu le Zimbabwe kumele libonge ele Kenya okuyilo eliliphathise ukuba lifinyelele kusigaba se semi-final ngokunqoba elikwenze ele Swaziland ngoMvulo nge 1 ka nya.
Aluba iqembu le Swaziland belenelise ukunqoba ele Kenya amankazana eZimbabwe abezahle aphelelwe ngumphako kodwa umqeqetshi waleliqembu, uMduduzi Nxumalo, uthi bafunde okunengi kulumncintiswano loba nje sebebhekise amabombo ekhaya.
“Sizenzele phansi thina ngoba kube sadla iMozambique ngabe asikho kulenkinga esikuyo ngoba aluba silemiklomelo eyisithupha okutsho ukuba loba sinqotshiwe lamuhla besiyayala kuyithi esidlulela phambili. Loba kunjalo amankazana adlale kuhle kakhulu ngilethemba loba bebuyela ekhaya kukhona abakuphethe okuzabenza babe ngabadlali abangcono.”
Komunye umdlalo wesibaya sika Group B odlalwe ngoMvulo iqembu le Mozambique litshaye ele Mauritius nge 3 ka nya enkundleni ye Luveve.
Lo bekungumdlalo wokucina ukudlalelwa enkundleni ye Luveve kulumncintiswano njengoba imidlalo ye semi - final ezadlalwa ngoLwesine kanye lowe final ozadlalwa mhla zingamatshumi amabili lane izadlalelwa enkundleni ye Barbourfields