amalinks wokungena

Breaking News

Liqinisa Ubudlelwano Labalandeli Iqembu leBosso


Highlanders FC
Inkokheli zeqembu lenguqu eleHighlanders ziqhubekela phambili ngenhlelo zokuqinisa ubudlelwano labasekeli baleliqembu.

Ensukwini ezedluleyo inkokheli zeqembu le Bosso zivakatshele edolobheni lase Plumtree ngemva kokumenywa lugatsha lwabalandeli beqembu olwe Highlanders FC Plumtree Supporters Chapter.

Isikhulumeli seqembu le Highlanders uRonald Moyo uthi bahle basebenzisa lelothuba ukuba baxoxisane kabanzi labalandeli beqembu laba.

“Esakuthakazelela kakhulu yimbono abayifakayo kithi. Njengabasekeli beqembu kulezinto ababona angani ziyasilela ikakhulu kibo khonangale ePlumtree yikho ke sisuke silobe lezozinto phansi. Lokhu kuzasinceda ngoba sesikwazi ukuba kuyini okumele sikwenze sisiya phambili okutsho ukuba kwakuluhambo oluhle kakhulu,” kutsho uMoyo.

Izikhalazo ezikhulunywe ngabalandeli beqembu le Highlanders edolobheni le Plumtree ngezigoqela ukuba iqembu liqale inhlelo zokudinga abadlali kulelodolobho kanye lasemaphandleni aligqagqeleyo.

Ngalokho ke bathe kumele kuqalwe inhlelo ezokubuthanisa abadlali besekusithi abaqeqetshi beqembu bavakatshele lezondawo okulabadlali khona bayekhetha abadlali abalethalenta.

UMoyo uthe kabasoze bame kodwa bazaqhubekela phambili bevakatshela abalandeli beqembu endaweni ezehlukeneyo.

“Thina njengeqembu sithi yiyo indlela esifuna ukusebenza ngayo kusiyaphambili. Lizabona nje sihamba hamba indawo ezinengi sihlangana labasekeli, sithatha imibono yabo njalo sibazisa ukuba kumi njani eqenjini lathu njengoba lisazi ukuthi ubuhle be Bosso ngabalandeli bayo. Yibo abanikazi bayo.

Kuqakathekile ukuba sihlangane labo sikhulumisane labo, sizwe imibono yabo siphinde njalo sibathengisele lempahla esilayo ukuze sithole imali,” kutsho uMoyo.

Impahla elophawu lweqembu ebithengiselwa abalandeli beqembu leBosso edolobheni lase Plumtree ngegoqela inkomitsho kanye lezikhwama.

Inengi labalandeli libikwa lithenge inkomitsho kwathi uJabulani Mangwana Tshuma, indodana yowayengumgcinisihlalo weqembu umuyi uJames Mangwana Tshuma, nguye owenelise ukuthenga isikhwama esithungwe ngesikhumba seMpofu, esibiza amadola angamakhulu amabili lamatshumi amahlanu aseMelika.

Phezu kokuthenga lokhu obekuphethwe zinkokheli zeqembu abe Highlanders FC Plumtree Supporters Chapter baphe iqembu imali eyatshaywa ngabasekeli beqembu eyokuncedisa iqembu ngesikhathi kungelamidlalo ngenxa yobhubhane lwe Covid 19.

Baphinde bacela njalo imvumo eyokuba babe lendawo eyokuthengisela impahla elophawu lweqembu le Highlanders ukuze iqembu liyale lilokhu lithola imali.

Facebook Forum

XS
SM
MD
LG