Ekhuluma ekupheleni komdlalo uMapeza uthi bazihlabe ngowabo umkhonto ngoba bethole amathuba ambalwa awokuba bahlohle kodwa bangawasebenzisi.
Uqhubekele phambili wathi kabasoze balahle imbeleko ngokufelwa njengoba besazodlala umdlalo wehlandla lesibili leqembu le ASC Jaraaf ngempelaviki ezayo.
“Sithole amathuba amahle awokuthi silitshayele emambuleni kodwa sehlulekile ukuwasebenzisa. Ngokubona kwami ukungadlali mihla ngemihla kusiphazamisile ngoba besingekho bukhali njengalokhu esiba yikho khona nxa sidlala maviki wonke.
Loba kunjalo akumelanga sihle silahle phansi izikhali ngoba kusaselomunye umdlalo okumele siwudlale njalo kungenzeka siye khonale sifike sinqobe. Asikaphelelwa ngumphako,” kutsho uMapeza.
Iqembu le FC Platinum likhuthe umbekwa ngehlandla lakuqala elomdlalo lapho uSilas Songani abanjelwe ngunozinti weqembu lezivakatshi.
Kuthe sekusele imizuzwana ukuba umdlalo uphele uGift Bello wakhutha indlovu ibotshelwe lapho ibhola lakhe elitshaye igedi labuyela enkundleni unozinti engekho lokubakhona.
Ngokuvumela ukuba iqembu lezivakatshi lihlohle lidlala lingekho ekhaya, iqembu le FC Platinum kuzamele linqobe ngamagoli amabili kungela mpendulo khonale kwele Senegal kuhlandla lesibili elomdlalo.
Amaqembu lawa azaphindana umphehlo ngeSonto njalo iqembu elizanqoba lapho lizathola ilungelo elokuyancintisa kusigaba sezibaya esomncintiswano we CAF Confederation Cup.
Iqembu le FC Platinum lidlala kulumncintiswano ngemva kokukhutshwa kumncintiswano we CAF Champions League ngele Simba SC elakwele Tanzania lapho osekuhambe ukuyadlala khona abadlali abambalwa abayizizalwane zakwele Zimbabwe.
Umdlalo wenguqu kwele Zimbabwe umiswe nyakenye ngemva kokumemetheka komkhuhlane we Covid 19 njalo kulokhu kungacaci ukuba uzaqhubekela phambili nini.