amalinks wokungena

Breaking News

Liyakhuphuka Iqembu leHighlanders Engalaneni Yemiklomelo Emidlalweni yePSL


Highlanders FC

Iqembu leli likhuphuke layahlala endaweni yetshumi engalaneni yemiklomelo ngemva kwemidlalo eyeviki lamatshumi amabili lesithupha lapho elinqobe khona ele TelOne nge 2 ka nya.

Umqeqetshi weqembu lenguqu eleHighlanders, uHendrik Pieter De Jongh uthi iqembu lakhe liqhubekela phambili likhuphuka engalaneni yemiklomelo, esigabeni eseCastle Lager Premier Soccer League ngoba seliqalile ukulandela okwenziwa ngamaqembu aphetsheya.

Iqembu leli likhuphuke layahlala endaweni yetshumi engalaneni yemiklomelo ngemva kwemidlalo eyeviki lamatshumi amabili lesithupha lapho elinqobe khona ele TelOne nge 2 ka nya.

Limpumela ikhuphule inani lemiklomelo eselibuthelelwe ngabafana be Bosso laya kumatshumi amathathu lanhlanu njalo leliqembu kalizake linqotshwe selokhu umqeqetshi walo omutsha uDe Jongh efike kwele Zimbabwe.

UDe Jongh, oyisizalwane sakwele Netherlands, utshele intathelizindaba zemidlalo ukuba ufike waguqula indlela okusentshenzwa ngayo kuqembu le Highlanders yikho nje selitshaya eziwayo kulezinsuku.

“Ngiguqule okunengi ekufikeni kwami okugoqela ukudla okudliwa ngabadlali, ukuzilolonga kanye lemithetho okumele ilandelwe ngabadlali kanye labakhokheli beqembu.

Lokhu kungabe kwethuse abayingxenye yeqembu kodwa kimi akumangalisi ngoba yikho vele okwenziwa kwamanye amazwe lapho umdlalo wenguqu osezingeni laphezulu,” kutsho uDe Jongh.

Phezu kwengalane yemiklomelo iqembu le CAPS United lilokhu likhokhela ngemiklomelo emihlanu ngemva kokunqoba elikwenze ele Hwange nge 3 ka 1 njalo lilemiklomelo engamatshumi amahlanu.

Endaweni yesibili kuleqembu le FC Platinum lona elilemiklomelo engamatshumi amane lanhlanu njalo elinqobe ele Yadah nge 3 ka 1.

Iqembu le Chicken Inn liqhubekela phambili lilahla imiklomelo njengoba libe ngutshiki lobhanqa 0 ka 0 lele Black Rhinos njalo lihlezi endaweni yesithathu lilemiklomelo engamatshumi amane lantathu.

Endaweni yesine kuleqembu le ZPC Kariba lona elinqotshwe nge 1 ka nya ngele Manica Diamonds njalo liyale lilokhu lilemiklomelo engamatshumi amane lowodwa.

Emsileni wengalane kuleqembu le Yadah lona elilemiklomelo engamatshumi amabili lane kuthi endaweni eyesibili nxa usuka emsileni kuleqembu le Herentals lona elibe ngutshiki lobhanqa 1 ka 1 leqembu le Chapungu njalo lilemiklomelo engamatshumi amabili lesithupha.

Endaweni yesithathu nxa usuka emsileni kuleqembu le Mushowani Stars lona elinqotshwe nge 3 ka 2 liqembu le Harare City njalo lilemiklomelo engamatshumi amabili lesikhombisa.

Iqembu le Bulawayo Chiefs lithuthukise amathuba alo awokusinda ekugunyulweni kusigaba saphezulu ngokunqoba elikwenze iqembu le Triangle nge 2 ka nya.

Limpumela idale ukuba iqembu le Chiefs likhuphuke liyehlala endaweni yesine nxa usuka emsileni wengalane lilemiklomelo engamatshumi amabili lathoba minwe mbili.

Lelinani lemiklomelo yilo eliphethwe ngamaqembu amathathu ahlezi phezu kweqembu le Chiefs engalaneni abalisa ele Hwange, ele Harare City kanye lele TelOne.

please wait

No media source currently available

0:00 0:02:25 0:00


Facebook Forum

XS
SM
MD
LG