amalinks wokungena

Breaking News

Liyezingela KweleAlgeria Iqembu leZimbabwe Warriors


U-Zdravko Logarusic umqeqetshi weqembu elimela isizwe emdlalweni wenguqu, elamaWarriors

Iqembu labesilisa elimela ilizwe emdlalweni wenguqu elama Warriors lise Algeria lapho eliyadlala khona kusasa leqembu elimela lelo lizwe kumncintiswano owokudinga amaqembu azakuyadlala kumidlalo eyokudinga intshantshu zezwekazi lase Africa ngomnyaka ka 2022.

Umqeqetshi weqembu lama Warriors uZdravko Logarusic utshele intathelizindaba zemidlalo phambilini kokuphakama kweqembu leli lilubhekise kwele Algeria ukuba yena labadlali bakhe bazimisele ukuyamela ilizwe le Zimbabwe khonale kwele Algeria loba nje amalungiselelo abo abengekho mahle.

“Akulasizatho esokuba singabi lethemba elokuba sizaqhuba kuhle ngoba silabadlali abezinga laphezulu.

Inkinga nje esilayo yikuba abadlali bethu abanengi bakhathele ikanti abanye njalo balimele. Udubo kube yimithetho elawula ukuhamba kwabantu emhlabeni jikelele ngenxa yomkhuhlane we Covid 19 ngoba abadlali bethu bacine behamba imango emide.

Ngaphandle kwalokho abadlali bathi kimi kumele kudlalwe sibatshengise lathi abe Algeria ukuba lathi sizintshantshu,” kutsho uLogarusic.

Inkokheli zeqembu le Zimbabwe zibize abadlali abambalwa abadlala beselizweni lase Ngilandi njalo omunye wabo uJordan Zemura uthi bakhangelele ukuthola imiklomelo kumidlalo emibili abazayidlala leqembu le Algeria.

“Sibhekane lomdlalo omkhulu kakhulu kodwa kuqakathekile ukuthi lidlale lentshantshu ukuze lani libe zintshantshu. Nxa singenelisa ukuthola imiklomelo kumidlalo esizayidlala le Algeria siyabe sesizifake esimeni esihle ngoba phela iqembu le Algeria yilo iqembu elihamba phambili kuzwekazi lase Africa,” kutsho uZemura.

Iqembu le Algeria lilabadlali abambalwa abadlala kumaqembu amakhulu kuzwekazi lase Europe kodwa omunye laye umdlali weqembu lama Warriors odlala kwele Ngilandi uAdam Chiksen uthi yena akabesabi.

Mina angikutshayi indiva ukuba balabadlali abalodumo. Angicabangi langabo okwakhathesi ngoba lokho kungangiphazamisa. Yebo kambe singabe sidlala leqembu elizitshantshu zezwekazi lase Africa kodwa mina vele kangesabi muntu. Ngizaze ngicabange ngabo sengingene enkundleni njalo lokho kwenza ngingayethuki lutho,” kutsho uChiksen.

Iqembu le Algeria lele Zimbabwe azadibana ngoLwesine ebusuku njalo angena kulumdlalo iqembu le Algeria kuyilo elihlezi phezu kwengalane lilemiklomelo eyisithupha ikanti ele Zimbabwe lisendaweni yesibili lilemiklomelo emine.

Amaqembu lawa azaphinda aphindane umphehlo njalo ngoMvulo kuwo njalo umkhankaso wokudinga amaqembu azaphumelela ukuyadlala kumncintiswano we Afcon ephuma kusibaya sika Group H.

Ezemidlalo siziphiwa nguJoseph Njanji
please wait

No media source currently available

0:00 0:02:30 0:00

Facebook Forum

XS
SM
MD
LG