Umqeqetshi weqembu lomdlalo wenguqu elimele ilizwe le Zimbabwe kumncintiswano we CAF Champions League ele FC Platinum uLizwe Sweswe uthi ukhangelele ukuthatha yomithathu imiklomelo lapho iqembu lakhe elizadibana khona lele Etoile du Sahel elakwele Tunisia ngoMgqibelo.
USweswe utshele intathelizindaba ukuba okuqakathekileyo yikuba bona balungiselele ukudlala umdlalo wenguqu bedinga ukuba benqobe njalo kabalungiselelanga becabanga ukuba iqembu le Etoile du Sahel ngelinye lamaqembu alodumo kuzwekazi lase Africa.
“Njengomqeqetshi labadlali okuqakathekileyo yikuba wonke umdlalo esikhangelele ukuwudlala ukunqoba kube yikho okusemqoka hatshi ukukhangela imbali kodwa okukhulu kube yikuthi siyedlala sikhangelele ukunqoba,” kutsho uSweswe.
Iqembu le FC Platinum linqotshwe nge 2 ka 1 liqembu le Al Hilal emdlalweni walo wakuqala owesibaya sika Group B kumncintiswano walonyaka owe CAF Champions League njalo imbiko evele khonale kwele Sudan ithi leliqembu lidlale kuhle kodwa lehluleke ukusebenzisa amathuba eliwatholileyo laseliphinda njalo liyekethisa ukuvimba emuva.
USweswe ukhuthaze abalandeli bomdlalo wenguqu ukuba babuye bezosekela iqembu le FC Platinum ngoba phela limele ilizwe le Zimbabwe kulumncintiswano owokudinga intshantshu zezwekazi lase Africa.
“Usekelo lwabo siyaludinga kakhulu ngoba njengoba sidlala lapha kasimelanga iqembu le FC Platinum kuphela kodwa simele ilizwe lonke jikelele njalo ukubuya kwabo kuzasipha umdlandla,” kutsho uSweswe.
Ngokwesibili ukuba iqembu le FC Platinum lifinyelele ukudlala kusigaba sezibaya kumncintiswano owokudinga intshantshu zezwekazi lase Africa ikanti iqembu le Etoile du Sahel selike lagcotshwa ukuba zintshantshu zezwekazi lase Africa ngemva kokunqoba kumncintiswano we CAF Champions League, CAF Super Cup, CAF Confederation Cup kanye laku African Cup Winners Cup.
Komunye umdlalo wesibaya sika Group B iqembu le Al Ahly elakwele Egypt lizangqikilana lele A Hilal elase Sudan namhla ntambama.
Imidlalo yeviki lesibili ithola iqembu le Al Hilal kuyilo elihlezi phezu kwengalane lilemiklomelo emithathu okulinani eliphethwe liqembu le Etoile du Sahel kodwa umehluko kuyikuba iqembu le Al Hilal lona lihlohle kabili lapho linqoba ele FC Platinum nge 2 ka 1 kuthi ele Etoile du Sahel lona linqobe ele Al Ahly nge 1 ka nya.
Kusenjalo namhla ntambama kuzagcotshwa umdlali onguye odlale okwedlula abanye bonke kusigaba se Castle Lager Premier Soccer League emkhosini ozaqhutshelwa esigodlweni iHarare.
Lumdlali ukhangelelwe ukuphuma phakathi kwabadlali ababalisa uJoel Ngodzo oweqembu le CAPS United, uPrince Dube oweqembu le Highlanders, uRalph Kawondera oweqembu le Triangle, uNever Tigere oweqembu le FC Platinum kanye lonozinti weqembu le Highlanders uAriel Sibanda.
