amalinks wokungena

Lokhe Kunzima Ukuvula Ibhizimusi Kwele Zimbabwe: World Bank

  • Gibbs Dube

Ibhanga le World Bank lithi lokhe kuhlupha ukuvula ibhizimusi kwele Zimbabwe loba kulohulumende womanyano njalo kulogatsha lwelizwe olukhangelane lezamabhizimusi.

Ibhanga leli elisanda kwethula ugwalo lwalonyaka lokusebenza kwamabhizimusi emhlabeni wonke jikelele olubizwa ngokuthi yi ‘Doing Bbusiness 2012 Report’, lithi kunengi okuhluphayo eZimbabwe.

Lithi lokhu kogoqela ukwehluleka kwe Zimbabwe Electricity Supply Authority ukuthi ifake umlilo kagetsi endaweni zamabhizimusi amatsha lokulungiswa kwencwadi zalabo abangena kwezokwakha.

IWorld Bank ithi okunye njalo okuhluphayo yikuswelakala kwendlela ezilula zokuthi osomabhizimusi bathole izikwelede zokuthuthukisa amabhizimusi abo.

Iphinde yathi ele Zimbabwe likhanye lisiwa kungalani yamazwe ekhangelane lokwenza amabhizimusi emazweni alikhulu lamatshumi ayisitshiyangalombili lantathu.

IZimbabwe ikusibanga esilikhulu lamatshumi ayisikhombisa lanye kungalani le. Ngomnyaka ophelileyo kade ime kukhulu lamatshumi phose ayisikhombisa.

Umnu. Bulisani Ncube usomabhizimusi wakoBulawayo uthe okuhluphayo kwele Zimbabwe yikuthi izisebenzi sezithanda ukufumbathiswa zingakalungiseli muntu amaphepha afunakalayo.

XS
SM
MD
LG