amalinks wokungena

Breaking News

Lithwele Nzima Iqembu leDynamos Elingadlali Kahle kuPSL


Liqhubekela phambili lisehluleka ukunqoba iqembu lomdlalo wenguqu ele Dynamos emidlalweni yalonyaka eyesigaba seCastle Premier Soccer League.

Isimo sengalane ngemva kwemidlalo eyisithupha yesigaba sePSL siveza ukuba iqembu leDynamos lihlezi endaweni yesibili nxa usuka ngaphansi kwengalane lilemiklomelo emithathu.

Limiklomelo liyithole ngemva kokuba libe ngutshiki lobhanqa emidlalweni emithathu kuthikweminye emithathu linqotshiwe.

Umsekeli weqembu leDynamos uNyasha Chiweshe uthi akaselalo ithemba elokuba iqembu le Dynamos likhona lizavuka lincintise ukuphakamisa isicoco.

“Angithokozi ngendlela ithimu eyenza ngakhona njalo lokuphakama angiboni ingaphakama osekumele kwenzakale nje yikuvikela ukungagunyulwa. Into zivele ziphambaniseke ekutheni abadlali kabaphiwa imali okwenza minyaka yonke iqembu lihlale lisakhiwa kakutsha.”

Iqembu leDynamos lele ZPC Kariba elihlezi emsileni wengalane lilemiklomelo emibili yiwo kuphela amaqembu angakanqobi kumidlalo yalonyaka.

Phezu kwengalane iqembu le FC Platinum yilo eselihlezi esiqongweni ngemva kokunqoba ele Harare City nge 3 ka 1 ngoMgqibelo kwathi lelo ebelikhokhela emavikini ayedluleyo ele Ngezi Platinum lona laba ngutshiki lobhanqa 1 ka 1 lele Shabanie Mine.

Zombili izimbamgodi zelitshe leplatinum zilemiklomelo elitshumi lesithupha iqembu ngalinye kodwa ele FC Platinum lihlezi phezulu ngoba lihlohle kanengi.

Iqembu elisile ngesikhala senalithi ekugunyulweni kusigaba saphezulu ele Bulawayo City kuzamele libophe ziqine njengoba liyala lilokhu lisehla engalaneni yemiklomelo njengoba seliphenduke umthatshuzwa.

Abafana baka masipala wedolobho lako Bulawayo basendaweni yesithathu nxa usuka ngaphansi kwengalane yemiklomelo belemiklomelo emine.

Facebook Forum

XS
SM
MD
LG