amalinks wokungena

Luqhubekela Phambili Udubo Lokusilela Kwemali Emabhanga eZimbabwe

  • Praxedes Jeremiah

Abadinga imali yabo kwelinye ibhanga eHarare.

Ukuswelakala kwemali emabhanga kuqhubekela phambili eZimbabwe osokubangele inhlupho ezinengi ebantwini.

Abanye sebekhuthaza ukuthi usibalukhulu webhanga elikhulu lesizwe, uMnu. John Mangudya, atshiye umsebenzi ngoba eseyehlulekile ukulungisa udaba lolu.

Imali yohlobo lwamabond notes eyalethwa ngabebhanga ele Resverve Bank of ZImbabwe (RBZ) ngenhloso yokwehlisa uhlupho lwemali ibikwa ingancedi lutho nanku isingasatholakali layo elizweni lasemabhanga.

Njengabanye abanengi elizweni, uNkosazana Faith Siziba, ngomunye wababhekane lobunzima bokuthola imali.

UNkosazana Siziba, ongomunye wabaphila ngokuthengisa, ukhala ngenhlupho ababhekana lazo ekufinyeleleni imali emabhanga kanye lakubathengi.

Abantu abammele ukuthola imali emabhanga koBulawayo
Abantu abammele ukuthola imali emabhanga koBulawayo

Inengi labaphila ngokuthengisa bechapha imingcele besiya emazweni angomakhelwane bathi sebeze bebanjwa ngamandla ukuthenga imali yohlobo lwamabond notes kulabo abathenga lokuthengisa imali yakwamanye amazwe osiphatheleni.

Ingcwethi ebona ngezenotho engumsekeli kamqondisi wenhlanganiso yeCentre for Public Engagement, uMnu. Butler Tambo, uthi bona njengengcwethi zenotho bebekhangelele ukuthi uhulumende uzaphuma lamasu athile okwehlisa udubo olubhekane labantu lokusilela kwemali elizweni

“Ekade sisakukhangelele ukuze sithuthukise ilizwe yikuthi kutholakale imali evela kwamanye amazwe le esingathi yi-foreign direct investment, ukuthi ilethwe elizweni izovuselela amankampani lapha kwelakithi eZimbabwe.”

Uqhubeke esithi okunye abakukhangeleleyo yikuthi ilizwe liyecela imali emabhanga afana leWorld Bank lamanye.

Ama bond notes aqale ukusetshenziswa elizweni ngoLwezi nyakenye ngemva kokuqhamuka kodubo lokusilela kwemali okukhulu eZimbabwe ibhanga elikhulu lelizwe lisithi lokhu kuzanceda ukwehlisa lolu dubo kodwa akuzange kwanceda lutho njengoba udubo lokhu lusiba lubi ngamandla.

Lolu dubo lwemali luqale ngomnyaka ka2009 lapho ilizwe elaqala ukusebenzisa imali yakwamanye amazwe egoqela idola leMelika, iRand lakwele South Africa, iPula leBotswana lemali yakwele China.

UMangudya ubikwa wathi nxa udubo lokusilela kwemali lungasaqedwanga yikuza kwama bond notes yena uzashiya umsebenzi ngesikhathi ebhekane labantu abatshengisela besithi kabayifuni limali.

Inengi labantu selibheke ngabomvu ukuthi kuyozala nkomoni nanku phela udubo lokusilela kwemali luqhubekela phambili.

Facebook Forum

XS
SM
MD
LG