Uhlelo lwenkantolo lokudinga abazathetha icala lokubulawa konsundu eMelika uMnu George Floyd ngomhlophe owayelipholisa uMnu Dereck Chauvin luyaqhubeka namuhla.
Umthethwandaba uhlalile okosuku lwesibili izolo wakhetha abathethi ababili, ama-jurors ngesingisi.
Lokhu kutsho ukuthi sokukhethwe abantu abahlanu phakathi kwabalitshumi lambili abadingakalayo.
Abakhethwe izolo ngowesilisa onsundu odabuka ezwekazi leAfrica lowesifazana ongasomuntu omhlophe.
Abathathu abakhethwe ngoMvulo ngabamhlophe besilisa. Ukuze umuntu abe ngumthethi wecala kumele atshengise inkantolo ukuthi akulacele alithathayo.
UChauvin wetheswa icala lokubulala uFloyd nyakenye ngokumbandezela ngedolo entanyeni waze waphela umoya lanxa wayelokhe ekhala emtshela ukuthi kasenelisi ukuphefumula kuhle.
Udaba lolu lwabangela ukutshengisela eMelika lasemhlabeni jikelele inengi lisola uchuku oluqondiswe ebantwini abansundu ngamapholisa amhlophe kanye lokubandlululwa nje kweminye imihlobo ngabamhlophe.
Ocubungula ezombusazwe uMnu Den Moyo utshele iStudio 7 ukuthi lanxa nje kungeke kwazakala ukuthi inkantolo izakwethula isinqumo bani, ubona kulobufakazi obusobala obungena umsolwa adliwe licala.
