Umongameli John Pombe Magufuli weTanzania uthi kusobala ukuthi inhlelo eziqhutshwa ngumongameli Mnangagwa ziyathuthukisa umnotho welizwe njalo kufanele amazwe aphetsheya ethule izijeziso zenotho azethesa eleZimbabwe ukwenzela ukuthi inguquko le iqhubeke.
Umongameli Magufuli, ufike ngoLwesibili kweleZimbabwe lapho aqoqelwe idili elikhulu, wasegqiba uhambo lwakhe ngoLwesithathu.
Uthe inguquko kwezomnotho ayisoze ibonakale ngokucacileyo okwamanje, njengenjayelo nxa kulohulumende omutsha, kodwa izabonakala kusiya ngesikhathi ngoba ivele ikhona.
Wengeze wathi eleTanzania lizasebenzelana lele Zimbabwe kwezomnotho, ezibalisa ukuthengiselana impahla lokunye.
Umongameli Magufuli wethekelele amathuna eHeroes Acre ngoLwesithathu, lapho alandiselwe khona imbali yempi yenkululeko lokuthi eleZimbabwe lathola njani uzibuse. Ubekhatshwe ngumphathintambo kahulumende obona ngokwenzakala ekhaya uMnu. Cain Mathema.
Ukuhlaziya loludaba,siqale ngokubuza ingcwethi ecubungula ezombusazwe uMnu. Walter Nsununguli Mbongolwane, ukuthi kambe liqiniso na ukuthi umnotho weZimbabwe uyathuthuka?
