Njengenjayelo minyaka-yonke, eleMelika ngoMvulo linanze ilanga lokuzalwa kowayelwela amalungelo abansundu kulelilizwe umuyi uMfundisi Martin Luther King Juniour, njalo bekulemicimbi-cimbi etshiyeneyo emadolobheni ehlukeneyo eyokuhlonipha umuyi.
Ukukhankasela amalungelo oluntu okwenziwa ngumuyi kwancedisa ukuthi eleMelika libe lemthetho eyaguqula impilo yabansundu egoqela owe Civil Rights Act kanye lowe Voting Rights Act ngomnyaka ka 1964 lo 1965.
Umuyi uMnu. King owathola isicoco senhlonipho yemisebenzi yakhe, eseNobel Peace Prize ngomnyaka ka1964, wabulawa ngomnyaka ka1968 njalo uhlonitshwa ngamazwe amanengi emhlabeni.
Wazakala ngamazwi akhe awakhuluma ngomnyaka ka 1963 athi “I have a dream” lapho anika khona abantu ithemba lokuthi ukubandlululana kuzaphela.
Umfundisi Anglistone Sibanda weZimbabwe uthi izenzo zikaMnu. King zakhuthaza amazwe akuzwekazi leAfrica ukuthi aqinisise ukulwela uzibuse.
Uthi umuyi wayelokuthula njalo engelabandlululo, isifundo esifanele eleZimbabwe.
