amalinks wokungena

Breaking News

Masisi: Kumele Bathathelwe Amanyathelo Abangena eBotswana Okungekho Emthethweni Ngesikhathi seCoronavirus


Umongameli Mokgweetsi Masisi weleBotswana
Umongameli Mokgweetsi Masisi weleBotswana

Umongameli Mokgweetsi Masisi wele Botswana uthi ukubone kuqakathekile ukuthi aye eNamibia, ukuyahlangana lomongameli Emmerson Mnangagwa, ukuze bakhulumisane phezu kodaba lwabeZimbabwe abangena elizweni lakhe okungekho emthethweni, ikakhulu kukhangelwe uhlupho lomkhuhlane weCoronavirus.

UMongameli Mokgweetsi Masisi, utsho lamazwi emhlanganweni lentathelizindaba eGaborone ngoLwesithathu.

Uhambo lokuya eNamibia olwenziwa yinkokheli yeAngola, Botswana le Zimbabwe, lusolwe kakhulu ngabanengi ngesikhathi umkhuhlane weCoronavirus uqala ukumemetheka emhlubulweni wangezansi kwezwekazi leAfrica.

UMasisi uthi wakubona kuqakathekile ukuthi akhulumisane lomunye wakhe uMnangagwa, ukuze kwenqabelwe ukungazwisisani phakathi kwabomakhelwane okwakungacina kudala ukufuthelana.

“KulabeZimbabwe abanengi kweleBotswana, abalemfanelo, labangelamfanelo, ngakho bekumele kube lamanyethela athathwayo, ikakhulu sikhangele abaselizweni okungekho emthethweni. Udaba lwakhona belungaba lakho ukuvusa ukungezwani phakathi kwamazwe womabili. Ngakho ngabona kufanele, ngemva kokukhuluma labanye bami, ukuthi ngihambe (eNamibia).”

Ekuphendukeni evela eNamibia, umongameli Masisi uzivalele endlini engahlangani labanye abantu okwamaviki amabili, ukuze kube lesiqiniseko sokuthi kathelelwanga igcikwane leCoronavirus.

EleBotswana lilungiselela ukungezelela isikhathi sokusebenza komthetho wayo oweState of Emergency, owethulwe njengendlela yokulwisana leCOVID-19.

UMasisi uthi ufuna inyanga eziyisithupha, ilizwe lakhe lingaphansi kwe state of emergency, noma nje inyathela leli lichothozwe ngabamabandla aphikisayo.

IBotswana iphakathi kohlelo lweziqondiso zokwalela abantu ukuhambamba loba ukubuthana olwelockdown.

AbeZimbabwe abahlala kwele Botswana labo baphakathi kwe lockdown, eyaqala ngoLwesihlanu oludluleyo.

Umnunzana Andreas Sibanda isizalwane seZimbabwe esesihlala kwele Botswana lanxa ebona ukuqakatheka kwale ilockdown kunzima ukuziphilisa kusimo esinje.

“Amaqinga asefakiwe awokuvikela umkhuhlane amahle, kodwa kithi thina esivela phandle kunzima ngoba inengi lethu singabaphila ngemsebenzi yokuncengisa, uzathola ukuthi lamuhla uyenza ipiece job, kusasa ipiece job laphayana. Nxa sekunje isimo sakhona, kunzima ukuthola imali. Njalo asikwazi ukuthi kuzwakwenzakalani ngemva kwamalanga abekiweyo.”

Umnunzana Mthabisi Dube ohlala eGaborone uthi ngesikhathi selockdown, kusuka kube nzima kulabo abangekho duzane lezihlobo...

“Kunzima ngoba awukwazi ukusebenza ukuthi imuli ithole isinkwa. Kodwa ke, kusinika ithuba ukuthi sichithe isikhathi lwemuli zethu, ngoba empilweni yalamuhla abantu basuka bebambeke kakhulu, sicine singalasikhathi lemuli zethu. Kodwa ukhumbule ukuthi kulabanye abakhatshana kulezihlobo zabo. Kubanzima kibo ngoba umuntu uyabe eyedwa esikhathini esinje.”

Inengi labeZimbabwe elihlala kweleBotswana liphila ngokudinga imsetshenzanya, ama piece jobs, ngakho ngesikhathi selockdown, kunzima ukuthi baphile.

Umongameli Masisi uthi akukacaci ukuthi bayanqoba empini yokulwisana lokumemetheka lokuthelelanwa kwecoronavirus, ebalisa ukuthi amalanga elockdown angengezwa.

Sekubanjwe abayisithupha abalomkhuhlane wecoronavirus eBotswana, kwabhubha umuntu oyedwa.

XS
SM
MD
LG